Luxury Car Theft News: హాలీవుడ్ చిత్రం 'ఫాస్ట్ అండ్ ఫ్యూరియస్' స్ఫూర్తిగా లగ్జరీ కార్ల దొంగతనాలకు పాల్పడ్డారు ముగ్గురు వ్యక్తులు. ఇలా ఒక్కనెలలో ఏకంగా 40కుపైగా లగ్జరీ కార్లను కొట్టేశారు. అందుకోసం స్కానర్లు, జీపీఎస్ జామర్ సహా హైటెక్ పరికరాలను వాడారు. శుక్రవారం నిందితులను అరెస్టు చేసిన పోలీసులు.. ఈ విషయాలను వెల్లడించారు.
నిందితులను మనీశ్ రావు, జగ్దీప్ శర్మ, ఆస్ మహమ్మద్లుగా పోలీసులు గుర్తించారు. వీరిలో మనీశ్ రావు, జగ్దీప్ శర్మ దిల్లీలోని ఉత్తమ్నగర్కు చెందిన వారు కాగా ఆస్ మహమ్మద్.. యూపీలోని మేరఠ్కు చెందిన వ్యక్తని వెల్లడించారు. పశ్చిమ్ విహార్ ప్రాంతం నుంచి దొంగిలించిన కారును రావు, శర్మ.. విక్రయానికి తీసుకొచ్చినప్పుడు వారిని అదుపులోకి తీసుకున్నారు పోలీసులు. అపహరణకు గురైన వాహనంలో చేసిన సోదాల్లో సెన్సార్ కిట్, మాగ్నెట్, ఎల్ఎన్టీ తాళాలు, 8 రిమోట్ కార్ తాళాలను స్వాధీనం చేసుకున్నారు. వీటితో పాటు రెండు తుపాకులు, టూల్కిట్స్, హ్యాకింగ్ డివైజ్, ఏడు కార్లు సహా 30 కార్లకు చెందిన తాళాలు నిందితుల వద్ద లభ్యమయ్యాయి.
ఇదీ చూడండి: నదిలో ఖరీదైన 'బీఎండబ్ల్యూ' కారు.. కారణం తెలిసి పోలీసులు షాక్
