Saji cheriyan controversy: భారత రాజ్యాంగంపై వివాదాస్పద వ్యాఖ్యలు చేసిన కేరళ మత్స్యకార, సాంస్కృతిక శాఖ మంత్రి సాజి చెరియన్ పదవికి రాజీనామా చేశారు. ఆ రాష్ట్రంలోని విపక్షాలు చెరియన్ వ్యాఖ్యలపై తీవ్రస్థాయిలో అభ్యంతరం తెలుపుతూ, మంత్రివర్గం నుంచి బర్తరఫ్ చేయాలని డిమాండ్ చేయగా.. ఆయన తలొగ్గాల్సి వచ్చింది.
"నేను రాజీనామా చేశాను. ఇది నా వ్యక్తిగత నిర్ణయం. నేను ఎప్పుడూ రాజ్యాంగాన్ని కించపరచ లేదు. నా ప్రసంగంలోని ఓ భాగాన్ని తీసుకుని, వక్రీకరించారు. సీపీఎంను, ఎల్డీఎఫ్ను బలహీనపరిచేందుకే ఇలా చేశారు" అని బుధవారం రాజీనామా అనంతరం ఓ ప్రకటనలో పేర్కొన్నారు చెరియన్.
చెరియన్ ఏమన్నారు?: మల్లపల్లిలో జరిగిన రాజకీయ కార్యక్రమానికి హాజరైన చెరియన్ ఈ వ్యాఖ్యలు చేశారు. కార్మికులు నిరసన వ్యక్తం చేసేందుకు దేశం అనమతించదని.. కానీ వారిపై దోపిడీ చేసే వారిని ప్రోత్సహిస్తోందని చెరియన్ విమర్శించారు. ఈ కారణంతోనే దేశంలో కార్పొరేట్ రంగం విస్తరిస్తూ.. మిలీనియర్ల సంఖ్య పెరిగిపోతోందని ఆరోపించారు. బ్రిటీష్ వారు సంకలనం చేసిన రాజ్యాంగాన్ని ఓ భారతీయుడు రాశారని.. దానినే 75 ఏళ్లుగా అమలు చేస్తున్నామన్నారు. లౌకికవాదం, ప్రజాస్వామ్యం వంటివి వాటిలో పొందుపరిచారని చెప్పారు. దేశంలో ఎవరు దీనికి విరుద్ధంగా చెప్పినా తాను అంగీకరించబోనని చెరియన్ స్పష్టం చేశారు.
"మనం రాజ్యాంగాన్ని అద్భుతంగా రచించుకున్నామని చెప్పుకుంటాం. ఇది భారత దేశానికే ప్రత్యేకమైనదని చెబుతాం. కానీ ఈ రాజ్యాంగాన్ని అత్యధిక ప్రజలను దోచుకునే విధంగా రాశారు."
- సాజి చెరియన్, కేరళ మంత్రి
చెరియన్ వ్యాఖ్యలపై ప్రతిపక్ష కాంగ్రెస్, భాజపా మంగళవారం తీవ్ర అభ్యంతరం తెలిపాయి. ఆయన్ను వెంటనే కేబినెట్ నుంచి తొలగించి కఠిన చర్యలు తీసుకోవాలని కాంగ్రెస్ డిమాండ్ చేసింది.
విచారం వ్యక్తం చేసిన చెరియన్: తాను ప్రజా సేవకుడినని.. రాజ్యాంగాన్ని తానెంతో గౌరవిస్తానని మంగళవారం చెప్పారు సాజి చెరియన్. రాజ్యాంగాన్ని కించపరిచే ఉద్దేశం తనకు లేదన్నారు. రాజ్యాంగంపై చేసిన వ్యాఖ్యల పట్ల ఆయన విచారం వ్యక్తం చేశారు. అయితే.. సాజి చెరియన్ను బర్తరఫ్ చేయాలంటూ ప్రతిపక్షాలు చేస్తున్న డిమాండ్ను అధికార సీపీఎం తోసిపుచ్చింది. పొరపాటున నోరు జారారని వ్యాఖ్యానించింది. చివరకు అన్ని వైపుల నుంచి వచ్చిన ఒత్తిడితో.. చెరియన్ మంత్రి పదవికి రాజీనామా చేశారు.
ఇదీ చదవండి: 'ఈ రాష్ట్రంలోనూ ఏక్నాథ్ శిందే పుట్టుకొస్తారు'.. భాజపా 'నాన్సెన్స్' జోస్యం!
