దిల్లీ ఇందిరా గాంధీ అంతర్జాతీయ విమానాశ్రయంలో అక్రమంగా తరలిస్తున్న 2330 గ్రాముల బంగారాన్ని పట్టుకున్నారు కస్టమ్స్ అధికారులు. అంతర్జాతీయ మార్కెట్లో దీని విలువ రూ.కోటికిపైగా ఉంటుందని తెలిపారు.
శనివారం ఉదయం దుబాయ్ నుంచి దిల్లీ చేరుకున్న వ్యక్తి వద్ద అక్రమ బంగారం ఉన్నట్లు అందిన సమాచారంతో తనిఖీలు చేపట్టారు. బంగారం గొలుసులను నడుముకు కట్టుకుని తరలిస్తున్నట్లు గుర్తించారు. బంగారు గొలుసులను స్వాధీనం చేసుకుని, స్మగ్లర్ను అరెస్ట్ చేశారు. గతంలో నాలుగు సార్లు బంగారాన్ని తరలించినట్లు ఒప్పుకున్నాడు.
నకిలీ కరెన్సీ ముఠా గుట్టు రట్టు
నకిలీ కరెన్సీ ముఠా గుట్టు రట్టు చేశారు దిల్లీ పోలీస్ ప్రత్యేక విభాగం అధికారులు. బిహార్లోని తూర్పు చంపారన్ జిల్లాలోని మోతిహారీకి చెందిన రసాల్ అనే వ్యక్తిని అరెస్ట్ చేశారు. అతని దగ్గరి నుంచి రూ.2.98 లక్షల విలువైన రూ.500 నోట్ల కట్టలను స్వాధీనం చేసుకున్నారు.
నకిలీ నోట్లపై సమాచారం అందిన క్రమంలో ఏసీపీ అతర్ సింగ్ నేతృత్వంలో ప్రత్యేక బృందాన్ని ఏర్పాటు చేసినట్లు ప్రత్యేక విభాగం డీసీపీ జస్మీత్ సింగ్ తెలిపారు. దక్షిణ దిల్లీలోని సరాయ్ కాలే ఖాన్ బస్ టర్మినల్ సమీపంలో నకిలీ కరెన్సీ చలామణి చేస్తున్నట్లు సమాచారం అందిందని చెప్పారు. నిందితుడిని పట్టుకని.. ప్రశ్నించగా నేపాలీ వ్యక్తి నుంచి తీసుకొచ్చినట్లు తెలిపాడన్నారు. కేసు నమోదు చేసి దర్యాప్తు చేపట్టినట్లు చెప్పారు.
ఇదీ చూడండి: ఎయిర్ ఏషియా విమానం అత్యవసర ల్యాండింగ్- కారణం ఇదే..
