కర్ణాటకలో దారుణం జరిగింది. నలుగురు కామాంధులు కదులుతున్న కారులో ఓ యువతిపై సామూహిక అత్యాచారానికి పాల్పడ్డారు. పార్క్లో స్నేహితుడితో మాట్లాడుతున్న యువతిని కారులోకి లాక్కెళ్లి అత్యాచారం చేశారా నిందితులు. బాధిత యువతి ఫిర్యాదు మేరకు కేసు నమోదు చేసుకున్న పోలీసులు నిందితులను అరెస్ట్ చేశారు. ఈ ఘటన మార్చి 25న జరగగా ఆలస్యంగా వెలుగుచూసింది.
పోలీసులు తెలిపిన వివరాల ప్రకారం
మార్చి 25న రాత్రి 10 గంటల సమయంలో.. బెంగళూరులోని కోరమంగళ ప్రాంతంలో ఉన్న నేషనల్ గేమ్స్ పార్క్లో.. ఓ యువతి తన స్నేహితుడితో కలిసి మాట్లాడుతోంది. అదే సమయంలో అక్కడకు కారులో వచ్చిన నలుగురు యువకులు వారిని చూశారు. వెంటనే వారి దగ్గరకు వెళ్లి ఆమె స్నేహితుడ్ని భయపెట్టి అక్కడ నుంచి పంపించేశారు. ఆ తర్వాత ఆ నలుగురు ఆమెను బలవంతంగా వారి కారులో ఎక్కించారు. అనంతరం దొమ్మలూరు, ఇందిరానగర్, అనేకల్, నైస్ రోడ్డుతో పాటు పలు ప్రాంతాల్లో కారులో తిరుగుతూ ఆమెపై అత్యాచారానికి పాల్పడ్డారు. రాత్రంతా కారుతో రోడ్లపై చక్కర్లు కొట్టిన వారు.. తెల్లవారుజామున 4 గంటల సమయంలో బాధితురాలిని తన ఇంటి సమీపంలో విడిచిపెట్టారు. ఈ విషయం ఎవరికైనా చెప్తే తీవ్ర పరిణామాలు ఎదుర్కోవలసి ఉంటుందని బెదిరించారు.
యువతిని గమనించిన స్థానికులు, కుటుంబసభ్యులు వెంటనే ఆస్పత్రిలో చేర్పించారు. చికిత్స పొందిన తర్వాత బాధితురాలు తనపై జరిగిన అత్యాచారం గురించి కోరమంగళ పోలీస్ స్టేషన్లో ఈనెల 26న ఫిర్యాదు చేసింది. కేసు నమోదు చేసుకున్న పోలీసులు.. సతీశ్, విజయ్, శ్రీధర్, కిరణ్ అనే నలుగురు నిందితులను అరెస్టు చేశారు. అయితే నిందితులు, బాధితురాలు ఇద్దరూ ఒకే ప్రాంతానికి చెందిన వారిగా పోలీసులు గుర్తించారు. బాధితురాలికి సంబంధించి మెడికల్ రిపోర్ట్స్ ఇంకా రావాల్సి ఉందని డీసీపీ సీకే బాబా తెలిపారు. ఈ ఘటనపై పూర్తి స్థాయిలో దర్యాప్తు జరుగుతోందని ఆయన వెల్లడించారు.
మహిళా రోగిపై అత్యాచారం..
ఇటీవలే కలబురగి జిల్లాలో.. ఆస్పత్రిలో చికిత్స పొందుతున్న ఓ మహిళా రోగిపై అత్యాచారం చేశాడు ఓ కామాంధుడు. అక్రమంగా మహిళల వార్డులోకి ప్రవేశించిన నిందితుడు ఈ అఘాయిత్యానికి పాల్పడ్డాడు. కలబురగికి చెందిన మహాబూబ్ పాషా అనే వ్యక్తి మార్చి 14న రాత్రి సమయంలో గుల్బర్గాలోని జీఐఎమ్ఎస్ ఆస్పత్రికి వెళ్లాడు. ఆస్పత్రిలో అటూ ఇటూ తిరిగిన అతడు.. చివరికి మహిళల వార్డులోకి ప్రవేశించాడు. అనంతరం అక్కడ చికిత్స పొందుతున్న 36 ఏళ్ల మహిళపై అత్యాచారానికి పాల్పడ్డాడు. దీనిని గమనించిన పక్క వార్డులోని ఓ రోగి.. నిందితుడిని పట్టుకుని గట్టిగా కేకలు వేశాడు. అరుపులు విని అక్కడికి చేరుకున్న ఆస్పత్రి సిబ్బంది.. జరిగిన విషయాన్ని తెలుకుని వెంటనే పోలీసులకు సమాచారం అందించారు. ఆస్పత్రి వద్దు చేరుకున్న పోలీసులు.. నిందితుడిని అరెస్ట్ చేశారు.
