అయోధ్యలో నిత్యం రద్దీగా ఉండే హనుమాన్ గఢీ చౌరస్తా వద్ద ట్రాఫిక్ పోలీస్కు, యువకుడికి మధ్య గొడవ జరిగింది. పార్కింగ్ విషయంలో తలెత్తిన వివాదం ఇద్దరి మధ్య ఫైట్కు దారితీసింది. తొలుత తనను ప్రశ్నించిన యువకుడిపై ట్రాఫిక్ పోలీస్ దాడి చేశాడు. అనంతరం కోపోద్రిక్తుడైన యువకుడు ప్రతిదాడికి దిగాడు. ఇద్దరి మధ్య గొడవను అక్కడి పోలీసులు నియంత్రించారు. ఇందుకు సంబంధించిన వీడియో సామాజిక మాధ్యమాల్లో వైరల్ అయింది. ఘటనను తీవ్రంగా పరిగణించిన అధికారులు విచారణ చేపట్టారు.
పార్కింగ్ సమస్య..
హనుమాన్గఢీ చౌరస్తా నిత్యం రద్ధీగా ఉంటుంది. ఇక్కడి మిఠాయి దుకాణాల యజమానులు వారి వాహనాలను రోడ్డుపైనే పార్క్ చేస్తారు. ఇది అక్రమమైనా ట్రాఫిక్ పోలీసులతో వారికున్న చెలిమి కారణంగా ఎలాంటి చర్యలు ఉండవు. హనుమాన్ దర్శనం కోసం సుదూర ప్రాంతాల నుంచి భక్తులు ఇక్కడికి వస్తుంటారు. మంగళవారం రద్దీ విపరీతంగా ఉంటుంది.
ట్రాఫిక్ పోలీసులు మాత్రం మిఠాయి దుకాణ యజమానులను ఏమీ అనకుండా ఇతర వాహనదారులతో దురుసుగా ప్రవర్తిస్తారని స్థానికులు ఆరోపిస్తున్నారు.
ఇదీ చూడండి: 'దేశద్రోహం'పై లోక్సభలో మాటల యుద్ధం
