మేజర్ కాకముందే వివాహం చేసుకున్న ఓ యువకుడు.. తన 45 రోజుల శిశువును చెరువులో పడేసి అత్యంత దారుణంగా హతమార్చాడు. చిన్న వయసులోనే బిడ్డకు జన్మనివ్వటంపై ఆందోళన చెందిన నిందితుడు.. యూట్యూబ్లో చూసి ప్రణాళిక రచించాడు. కోడి రక్తంతో పోలీసులు, గ్రామస్తులను తప్పుదోవ పట్టించాడు. ఈ అమానుష సంఘటన ఛత్తీస్గఢ్లోని దంతెవాడా జిల్లాలో వెలుగు చూసింది.
ఇదీ జరిగింది: బారసూర్ పోలీస్ స్టేషన్ పరిధిలోని ఉప్పెట్ గ్రామంలో 45 రోజుల నవజాత శిశువు కనిపించటం లేదని ఫిర్యాదు నమోదైంది. కేసు దర్యాప్తు చేపట్టిన పోలీసులు ఆశ్చర్యకర విషయాలను వెల్లడించారు. చిన్నారిని అతడి మైనర్ తండ్రే హత్య చేసినట్లు తేల్చారు. చిన్న వయసులోనే తండ్రి అయ్యాననే కారణంగా ఇలా చేశాడని చెప్పారు. ఈ కేసులో పసికందు తల్లిదండ్రులు ఇద్దరూ మైనర్లే కావటం గమనార్హం. గ్రామంలో జరిగిన ఓ సామాజిక కార్యక్రమంలో వారు వివాహం చేసుకున్నారు.
పోలీసులు వివరాల ప్రకారం.. తన బిడ్డను చంపేందుకు యూట్యూబ్ చూసి ప్రణాళిక రచించాడు నిందితుడు. తొలుత చిన్నారిని రాత్రి ఇంట్లోంచి అపహరించాడు. గ్రామ శివారులోని ఓ కల్వర్ట్ కింద దాచి పెట్టాడు. మరుసటి రోజు చిన్నారిని సమీపంలోని చెరువులో పడేసి హత్య చేశాడు. ఆ తర్వాత పాపకు చెందిన రుమాలు, నల్లటి దారం ఇంటి సమీపంలో పడేశాడు. కోడిని కోసి వాటిపై రక్తాన్ని పోశాడు. అటవీ జంతువులు చిన్నారిని ఎత్తుకు పోయాయని నమ్మించే ప్రయత్నం చేశాడు. అప్పటివరకు అతడిపై పోలీసులు, గ్రామస్తులు అనుమానపడలేదు.
నిందితుడి మొబైల్ ఫోన్ సీజ్ చేశారు పోలీసులు. ఐపీసీలోని 302 సెక్షన్ కింద హత్య కేసు నమోదు చేశారు. ఈ కేసుపై వివరాలు వెల్లడించారు దంతెవాడా ఎస్పీ సిద్ధార్థ్ తివారి ' మాకు లభించిన ఆధారాల ప్రకారం అనుమానాస్పద కేసుగా నమోదు చేసుకున్నాం. చిన్నారి తన తల్లి వద్ద ఇంట్లో నిద్రించగా.. కుటుంబ సభ్యులు బయట పడుకున్నారు. రక్తంతో తడిచిన ఓ గుడ్డ కనిపించింది. శిశువును అటవీ జంతువు లాక్కెళ్లిందని గ్రామస్తులు భావించారు. లోతుగా దర్యాప్తు చేపట్టగా చిన్నారి తండ్రే హత్య చేసినట్లు తేలింది. ' అని తెలిపారు.
ప్రియురాలి వేధింపులతో యువకుడు ఆత్మహత్య
మహారాష్ట్ర, వార్దా జిల్లాలో షాకింగ్ ఘటన వెలుగు చూసింది. మాండ్లా శివారా ప్రాంతానికి చెందిన ఓ యువకుడు తన ప్రియురాలి వేధింపులు తట్టుకోలేక ఆత్మహత్య చేసుకున్నాడు. సూసైడ్ లెటర్ ప్రకారం బాధితుడి తల్లి ఫిర్యాదు మేరకు సవంగి పోలీసులు కేసు నమోదు చేసుకుని దర్యాప్తు చేపట్టారు. బాధితుడు ఆశిశ్ భోపలేగా తెలిపారు. కృష్ణాపుర్ తాలూకాలోని ఆర్వీ గ్రామానికి చెందిన పార్బాతా కుంభేకర్ అనే యువతిని ఆశిశ్ ప్రేమించాడు. పార్బాతా, ఆమె స్నేహితుడు తిలక్ సాటోణేలు డబ్బులు ఇవ్వాలని ఆశిశ్ను వేధింపులకు పాల్పడ్డారు. ఇటీవల రూ.2 లక్షలు ఇవ్వాలని ఒత్తిడి చేశారు. అడిగిన డబ్బులు ఇవ్వకపోతే చంపేస్తామని బెదిరించారు. మనస్థాపానికి గురైన ఆశిశ్ ఇంటి సమీపంలోని చెట్టుకు ఉరివేసుకుని ఆత్మహత్యకు పాల్పడ్డాడు.
ఇదీ చూడండి: వ్యక్తిపై పెట్రోల్ పోసి నిప్పంటించిన దుండగుడు.. లైవ్ వీడియో
రాష్ట్రపతి పర్యటనకు ముందు ఉద్రిక్తత.. రెండు వర్గాల మధ్య ఘర్షణ
