మోసపూరిత మొబైల్ గేమింగ్ యాప్కు సంబంధించిన కేసులో ఏకంగా రూ.17కోట్లు నగదు స్వాధీనం చేసుకుంది ఎన్ఫోర్స్మెంట్ డైరెక్టరేట్. కోల్కతాలో ఆ యాప్ ప్రమోటర్కు చెందిన కార్యాలయాలు, నివాసాల్లో శనివారం సోదాలు జరిపి, ఈ నగదును గుర్తించింది.
"ఈ-నగ్గెట్స్ అనే గేమింగ్ యాప్, దాని ప్రమోటర్ ఆమిర్ ఖాన్కు సంబంధించి కోల్కతాలో దాదాపు 6 చోట్ల సోదాలు జరిపాం. రూ.17కోట్లు నగదు పట్టుబడింది. డబ్బు లెక్కింపు ఇంకా కొనసాగుతోంది" అని ప్రకటనలో తెలిపింది ఈడీ.
మోసం ఇలా..
ఈడీ తెలిపిన వివరాల ప్రకారం.. ఈ-నగ్గెట్స్ యాప్ ప్రారంభించిన కొత్తలో యూజర్లకు కమీషన్లు ఇచ్చారు. వ్యాలెట్లోని బ్యాలెన్స్ను సులువుగా విత్డ్రా చేసుకునే వీలు కల్పించారు. ఫలితంగా యూజర్లలో యాప్పై నమ్మకం పెరిగింది. ఎక్కువ కమీషన్కు ఆశపడి అధిక మొత్తంలో పెట్టుబడులు పెట్టారు. అలా భారీ మొత్తంలో నిధులు సమీకరించాక.. యాప్ నుంచి యూజర్లు కమీషన్ విత్డ్రా చేసుకునే ప్రక్రియను ఈ-నగ్గెట్స్ యాజమాన్యం నిలిపివేసింది. సిస్టమ్ అప్డేట్ చేస్తున్నామని, దర్యాప్తు సంస్థలు విచారణను ఎదుర్కొంటున్నామని సాకులు చెప్పింది. చివరకు యూజర్ల డేటా సహా సర్వర్లలోని సమాచారం మొత్తాన్ని డిలీట్ చేసింది. అప్పుడే ఈ యాప్ చేసిన మోసం జనాలకు అర్థమైంది.
ఈ-నగ్గెట్స్ యాప్ సహా ఆ కంపెనీ ప్రమోటర్పై 2021 ఫిబ్రవరిలో కోల్కతా పోలీసులకు ఓ ఫిర్యాదు అందింది. ఆ కేసు ఆధారంగా మనీలాండరింగ్ కోణంలో ఎన్ఫోర్స్మెంట్ డైరక్టరేట్ దర్యాప్తు ప్రారంభించింది. ఇటీవల అందిన సమాచారం ఆధారంగా శనివారం విస్తృత సోదాలు చేపట్టి, భారీ మొత్తంలో నగదు స్వాధీనం చేసుకుంది.
ఆన్లైన్లో సులువుగా రుణాలు ఇచ్చి, అధిక వడ్డీలతో వేధించి.. అనేక మంది ఆత్మహత్యలు చేసుకునేందుకు కారణమైన చైనీస్ లోన్ యాప్స్కు, ఈ-నగ్గెట్స్ మొబైల్ గేమింగ్ యాప్కు సంబంధం ఉందా అనే కోణంలోనూ ఈడీ దర్యాప్తు సాగిస్తోంది.
