TSPSC Paper Leak Case Update: రాష్ట్రవ్యాప్తంగా సంచలనం సృష్టించిన టీఎస్పీఎస్సీ ప్రశ్నపత్రం లీకేజీ కేసు దర్యాప్తును ఈడీ ముమ్మరం చేసింది. టీఎస్పీఎస్సీ పేపర్ లీకేజీ కేసులో కాన్ఫిడెన్షియల్ సెక్షన్ అధికారి శంకర్లక్ష్మిని గురువారం రోజున ఈడీ అధికారులు విచారించారు. దాదాపు 9 గంటల పాటు విచారణ జరిపి ఆమె వాంగ్మూలాన్ని రికార్డు చేశారు. తదుపరి విచారణకు ఆధార్ కార్డు, పాన్కార్డ్ తీసుకుని రావాలని ఆదేశించారు. కేసులో ఉన్న ప్రధాన నిందితులు ప్రవీణ్, రాజశేఖర్రెడ్డిల గురించి ఆమె వద్ద వివరాలను సేకరించినట్లు సమాచారం. అవసరమైతే వారిని విచారణకు మళ్లీ పిలుస్తామని చెప్పినట్లు తెలిసింది.
ల్యాప్ ట్యాప్, ప్రింటర్తో జైల్లోకి అనుమతించండి?: ఈ కేసులో ప్రధాన నిందుతులుగా ఉన్న ప్రవీణ్, రాజశేఖర్రెడ్డిలను కస్టడీకి ఇవ్వాలని ఈడీ వేసిన పిటిషన్పై గురువారం రోజున నాంపల్లి కోర్టులో వాదనలు జరిపారు. అయితే కోర్టు తీర్పును రిజర్వ్ చేసింది. ఇద్దరు నిందితులు చంచల్గూడ జైల్లో ఉన్నందున తామే నలుగురు అధికారులు జైల్కి వెళ్లి నిందితుల వాగ్మూలాన్ని రికార్డ్ చేస్తామని కోర్టుకు ఈడీ తెలిపింది. ల్యాప్ ట్యాప్, ప్రింటర్తో తమను జైల్లోకి అనుమతించాలని కోరింది.
TSPSC కేసును మనీ లాండరింగ్ కోణంలో ఈడీ దర్యాప్తు: ఈడీ అధికారులు నాంపల్లి కోర్టులో మరో పిటిషన్ దాఖలు చేశారు. టీఎస్పీఎస్సీ లీక్ కేసులో సిట్ వివరాలు ఇవ్వడం లేదని ఈడీ అధికారులు పిటిషన్లో పేర్కొన్నారు. పేపర్ లీక్ కేసుకు సంబంధించిన మొత్తం 8 రకాల డాక్యుమెంట్లు తమకు ఇవ్వాలని మార్చ్ 23న సిట్కు లేఖ రాశామని కోర్టుకు ఈడీ తెలిపింది. సిట్ ఇప్పటి వరకు ఎలాంటి వివరాలు ఇవ్వకపోవడంతో కోర్టును ఆశ్రయించి, కోర్టు దృష్టికి తీసుకువచ్చామని పేర్కొంది. మనీ లాండరింగ్ కోణంలో దర్యాప్తు చేస్తున్నామని.. కేసు వివరాలు ఇచ్చేలా సిట్కు ఆదేశాలు ఇవ్వాలని కోర్టును కోరింది. ఈడీ పిటిషన్పై కౌంటర్ దాఖలు చేసిన సిట్ అధికారులు కేసు కీలక దశలో ఉన్నందున వివరాలు ఇవ్వడం కుదరదని పేర్కొంది.
ED investigation on TSPSC paper leak case: మరోవైపు టీఎస్పీఎస్సీ పేపర్ లీక్పై సిట్ దర్యాప్తు కొనసాగుతుంది. ఈ కేసులో ఇప్పటికే కాన్ఫిడెన్షియల్ సెక్షన్ అధికారిని శంకర్లక్ష్మిని విచారించిన సిట్.. త్వరలో మరికొందరిని టీఎస్పీఎస్సీ అధికారులకు నోటీసులు ఇచ్చి విచారణ చేయనుంది. సాయి లౌకిక్, సుస్మితను ఇవాళ.. సిట్ కస్టడీలోకి తీసుకోనుంది. అయితే వారి ఇద్దరిని 3 రోజుల కోర్టు కస్టడీకి ఇచ్చింది. సాయి లౌకిక్.. ప్రధాన నిందితుడైన ప్రవీణ్ దగ్గర నుంచి డీఏవో ప్రశ్నపత్రం కొనుగోలు చేశాడు. కొనుగోలు చేసిన పత్రాని అతను భార్య సుస్మితకు ఇచ్చాడు. ప్రస్తుతం సాయి లౌకిక్, సుస్మిత చంచల్గూడ జైలులో ఉన్నారు.
ఇవీ చదవండి:
