రూ.100 కోట్ల వసూళ్ల ఆరోపణలకు సంబంధించి మహారాష్ట్ర మాజీ హోంమంత్రి అనిల్ దేశ్ముఖ్కి చెందిన ఇద్దరు సహాయకులను మనీలాండరింగ్ కేసులో ఎన్ఫోర్స్మెంట్ డైరెక్టరేట్ (ఈడీ) అరెస్టు చేసింది. ముంబయి, నాగ్‌పూర్‌లలోని దేశ్ముఖ్ నివాసాల్లో ఏకకాలంలో దాడులు చేసిన ఈడీ.. దేశ్ముఖ్ వ్యక్తిగత కార్యదర్శి సంజీవ్ పలాండే, పర్సనల్ అసిస్టెంట్ కుందన్ శిండేలను సుమారు తొమ్మిది గంటలపాటు ప్రశ్నించిన తరువాత అరెస్టు చేసినట్లు ప్రకటించింది. మంత్రిగా ఉన్న సమయంలో దేశ్ముఖ్కు రూ.4 కోట్లు ఇచ్చినట్లు కొందరు బార్ యజమానులు అంగీకరించినట్లు తెలుస్తోంది. ఈ మేరకు వాంగ్మూలాలను నమోదు చేసిన ఈడీ.. ఇద్దరినీ అదుపులోకి తీసుకుంది. అలాగే తమముందు వ్యక్తిగతంగా హాజరుకావాల్సిందిగా దేశ్ముఖ్కు సమన్లు జారీచేసింది.
వీరిని ముంబయిలోని ప్రత్యేక పీఎంఎల్‌ఐ కోర్టులో శనివారం హాజరుపరచనుంది. ఈ కేసులో సీబీఐ ప్రాథమిక విచారణ అనంతరం దేశ్ముఖ్ సహా ఇతరులపై.. బొంబాయి హైకోర్టు ఆదేశాల మేరకు కేసు నమోదు చేయనున్నట్లు తెలిపింది.
సోదాలు..
దేశ్ముఖ్ నివాసాలు, కార్యాలయాలపై ఎన్ఫోర్స్మెంట్ డైరెక్టరేట్(ఈడీ) శుక్రవారం దాడులు నిర్వహించింది. ఇందులో ముంబయిలోని ఇంటితో పాటు.. నాగ్పూర్లోని దేశ్ముఖ్ నివాసం కూడా ఉంది. బార్ యజమానుల నుంచి నెలకు రూ.100కోట్లు వసూలు చేయాలని దేశ్ముఖ్ పోలీసులకు లక్ష్యంగా పెట్టారని ముంబయి మాజీ పోలీస్ కమిషనర్ పరమ్బీర్ సింగ్ ఏప్రిల్లో ఆరోపణలు చేశారు. ఈ మేరకు ముఖ్యమంత్రి ఉద్ధవ్ ఠాక్రేకు లేఖ సైతం రాశారు. ఈ పరిమాణాల నేపథ్యంలో దేశ్ముఖ్ తన మంత్రి పదవికి రాజీనామా చేయాల్సి వచ్చింది.
పరమ్బీర్ ఆరోపణలపై దర్యాప్తు చేయాలని ఇటీవల బాంబే హైకోర్టు.. సీబీఐని ఆదేశించింది. దీంతో మాజీ మంత్రిపై సీబీఐ ఎఫ్ఐఆర్ దాఖలు చేసింది. దీని ఆధారంగా ఈడీ.. దేశ్ముఖ్పై అక్రమ నగదు చలామణి చట్టం(పీఎంఎల్ఏ) కింద క్రిమినల్ కేసు నమోదు చేసి తాజా సోదాలు నిర్వహించింది.
'అసహనంతోనే వేధింపులు..'
తమ పార్టీ సీనియర్ నేత అనిల్ దేశ్ముఖ్ను కావాలనే విచారణ సంస్థలు వేధింపులకు గురిచేస్తున్నాయని ఎన్సీపీ అధినేత శరద్ పవార్ ఆగ్రహం వ్యక్తం చేశారు.
"దేశ్ముఖ్ కొడుకు వ్యాపారాలపై ఆరా తీశారు. ఏమీ దొరకలేదు. ఆ అసహనంతో అనిల్ను వేధిస్తున్నారు. ఇవి మా పార్టీకి కొత్త కాదు. వాటి గురించి ఆందోళన చెందం."
-శరద్ పవార్
మరోవైపు విచారణాధికారులకు పూర్తిగా సహకరిస్తానని దేశ్ముఖ్ తెలిపారు. ఈడీ దాడులు రాజకీయ ప్రేరేమితమని, పార్టీ హస్తం ఉందన్న ఆరోపణలను భాజపా ఖండించింది.
ఇవీ చదవండి:
