బిహార్ బెగుసరాయ్లో పువ్వులు కోయడానికి వెళ్లిన ముగ్గురు బాలికలపై వీధి కుక్కలు దాడి చేశాయి. వాటి నుంచి తప్పించుకునే క్రమంలో బావిలో పడి ఓ బాలిక మరణించగా.. మరో ఇద్దరి పరిస్థితి విషమంగా ఉంది. ఈ ఘటన సోమవారం ఉదయం జరిగింది. దీనిపై సమాచారం అందుకున్న పోలీసులు.. కేసు నమోదు చేసుకుని దర్యాప్తు చేపట్టారు.
నవ్కోఠి పోలీస్ స్టేషన్ పరిధిలోని పహసర గ్రామానికి చెందిన నీలమ్ కుమారి(15), రీటా(12),రమప్రీత్(12) అనే ముగ్గురు బాలికలు సోమవారం ఉదయం పువ్వులు కోయడానికి వెళ్లగా వీధి కుక్కలు దాడి చేశాయి. వాటి నుంచి తప్పించుకునేందుకు బాలికలు పరుగెత్తారు. ఈ క్రమంలోనే వెళ్లి ఓ బావిలో పడ్డారు. బాలికల కేకలు విన్న స్థానికులు.. నిచ్చెన సాయంతో వారిని బయటకు తీశారు. ఈ ఘటనలో ఓ బాలిక ప్రాణాలు కోల్పోగా.. మరో ఇద్దరు బయటపడ్డారు. మృతురాలిని నీలమ్ కుమారిగా గుర్తించారు. ఇద్దరి పరిస్థితి ప్రస్తుతం విషమంగా ఉందని వైద్యులు తెలిపారు.
ఇవీ చదవండి: నడిరోడ్డుపై కార్ డోర్ తెరిచి స్టంట్స్.. క్షణాల్లోనే సీన్ రివర్స్!
'అమ్మకానికి గవర్నర్ పదవి, రాజ్యసభ సీటు!'.. రూ.100కోట్ల స్కామ్ బట్టబయలు
