గర్ల్ఫ్రెండ్స్ కోసం విమానం ఆపడానికి అందులో బాంబు ఉందని బెదిరింపు కాల్ చేశాడో యువకుడు. ఈ విషయం దిల్లీలోని ఇందిరాగాంధీ అంతర్జాతీయ విమానాశ్రయంలోని(ఐజీఐ) స్పైస్జెట్ కాల్ సెంటర్కు ఫోన్ చేసి చెప్పాడు. దీంతో అధికారుల ఆ విమానాన్ని ఖాళీ చేయించి.. క్షుణ్ణంగా తనిఖీ చేశారు. కానీ అందులో అనుమానాస్పదంగా ఏం లభించలేదు. దీంతో అందరూ ఊపిరి పీల్చుకున్నారు. ఫేక్ కాల్ చేసిన యువకుడిని పోలీసులు అదుపులోకి తీసుకుని ప్రశ్నించారు. అప్పుడు అసలు విషయం బయటపడింది.
పోలీసులు తెలిపిన వివరాల ప్రకారం... ద్వారకాకు చెందిన అభినవ్ ప్రకాశ్ అనే యువకుడు.. గత ఏడు నెలలుగా గురుగ్రామ్లోని బ్రిటిష్ ఎయిర్వేస్కు ట్రైనీ టికెటింగ్ ఏజెంట్గా పనిచేస్తున్నాడు. అతడి చిన్ననాటి స్నేహితులు రాకేశ్, కునాల్ షెరావత్ ఇటీవలే మనాలి రోడ్ ట్రిప్నకు వెళ్లారు. అక్కడ వారికి ఇద్దరు అమ్మాయిలు పరిచయమయ్యారు. ఆ యువతులు స్పైస్ జెట్కు విమానంలో పుణెకు వెళ్లాల్సిఉంది. అయితే, రాకేశ్, కునాల్కు అమ్మాయిలతో ఇంకా ఎక్కువ టైం స్పెండ్ చేయాలనిపించింది. ఈ విషయాన్ని ప్రకాశ్కు చెప్పారు. అనంతరం ముగ్గురూ కలిసి ప్లాన్ వేసి.. స్పైస్ జెట్ కాల్ సెంటర్కు ఫోన్ చేశారు. విమానంలో బాంబు ఉందని చెప్పారు. అనంతరం ఎయిర్పోర్టు అధికారులు తిరిగి కాల్ చేయగా.. లిఫ్ట్ చేయలేదు.
ఇదిలా ఉండగా, బాంబు సమాచారం అందుకున్న వెంటనే ఐజీఐ పోలీస్ స్టేషన్తో పాటు సీఐఎస్ఎఫ్ కంట్రోల్ రూమ్లను అప్రమత్తం చేశారు. పరిస్థితి తీవ్రతను దృష్టిలో ఉంచుకుని సీఐఎస్ఎఫ్ రంగంలోకి దిగింది. విమానంలో ఉన్న 182 మంది ప్రయాణికులను, సిబ్బందిని, వారి బ్యాగేజ్లను క్షుణ్ణంగా తనిఖీ చేశారు. అయితే అందులో అనుమానాస్పదంగా ఏమీ లభించలేదు. అనంతరం సాంకేతిక నిఘా బృందాల సాయంతో కాల్ ఎక్కడి నుంచి వచ్చిందోనని దర్యాప్తు చేశారు. తర్వాత ఆ నంబర్ అభినవ్ ప్రకాశ్ పేరు మీద ఉందని తెలిసింది. దీంతో పోలీసులు అభినవ్ను అదుపులోకి తీసుకుని విచారించగా అసలు విషయం చెప్పాడు.
ఈ ఘటనపై డీసీపీ స్పందించారు. ఇద్దరు అమ్మాయిలను కూడా తాము సంప్రదించామని చెప్పారు. విమానం ఆలస్యం అయిన విషయాన్ని మిగతా ఇద్దరు నిందితులు సెలబ్రేట్ చేసుకున్నారని.. ప్రకాశ్ అరెస్టైన విషయం తెలిసి పారిపోయారని చెప్పారు. వారి కోసం గాలింపుచర్యలు చేపట్టామని తెలిపారు.
