దేశంలో మోడెర్నా టీకాకు అత్యవసర వినియోగం కింద కేంద్రం అనుమతులు ఇచ్చింది. అమెరికాకు చెందిన మోడెర్నా వ్యాక్సిన్ దిగుమతుల కోసం.. ప్రముఖ ఫార్మా సంస్థ సిప్లాకు కేంద్ర ఔషధ నియంత్రణ సంస్థ(డీసీజీఐ) గ్రీన్ సిగ్నల్ ఇచ్చింది.
మోడెర్నా వ్యాక్సిన్ దిగుమతులు, మార్కెటింగ్ అనుమతుల కోసం.. డీసీజీఐకి సోమవారం దరఖాస్తు చేసింది సిప్లా. 18 ఏళ్లు పైబడిన వారికి ఈ టీకా అందించనున్నారు.
కొవాక్స్ టీకా పంపిణీ కార్యక్రమం కింద అమెరికా ప్రభుత్వం కొంత మొత్తంలో మోడెర్నా టీకాలను భారత్కు ఉచితంగా అందించనుందని కేంద్రానికి ఆ సంస్థ స్పష్టం చేసింది.
మోడెర్నా టీకాను ఎంఆర్ఎన్ఏ టెక్నాలజీతో అభివృద్ధి చేశారు. క్లినికల్‌ ప్రయోగాల్లో 90శాతానికి పైనే సమర్థత కనబర్చిన ఈ టీకాకు అమెరికాతో పాటు పలు సంపన్న దేశాలు అత్యవసర అనుమతులు మంజూరు చేశాయి.
50 మిలియన్ డోసులు..
మోడెర్నాను భారత్లో పంపిణీ చేసేందుకు సిప్లా.. ఆ సంస్థతో ఒప్పందం కుదుర్చుకుంది. మోడెర్నాకు అనుమతి లభిస్తే 2022 నాటికి భారత్కు 50 మిలియన్ టీకా డోసులు అందుబాటులోకి రానున్నాయి.
విదేశీ టీకాలను భారత్లో అందుబాటులోకి తెచ్చేందుకు కేంద్రం కృషి చేస్తోంది. ఇప్పటికే రష్యాకు చెందిన స్పుత్నిక్ వి టీకాకు భారత్లో అనుమతి లభించింది. దేశీయంగా.. కొవిషీల్డ్, కొవాగ్జిన్ టీకాలు గతంలోనే అందుబాటులోకి వచ్చాయి.
ఇదీ చదవండి : Pfizer:త్వరలో ఫైజర్ టీకాకు భారత్ అనుమతి!
