దివ్యాంగుడిపై విచక్షణా రహితంగా దాడి చేశారు ఇద్దరు వ్యక్తులు. పెద్దపెద్ద కర్రలతో తన వాహనంపై ఉన్న సమయంలోనే దారుణంగా కొట్టారు. స్థానికులు ఈ ఘటనను వీడియో తీయగా.. విషయం వెలుగులోకి వచ్చింది. పోలీసులు నిందితులిద్దరినీ అదుపులోకి తీసుకున్నారు. వారిద్దరూ భార్యాభర్తలని పోలీసులు తెలిపారు.
గ్రేటర్ నోయిడాలోని జెవార్ పోలీస్ స్టేషన్ పరిధిలో ఈ ఘటన జరిగింది. గజేంద్ర అనే దివ్యాంగుడికి.. జుగాండ్ అనే వ్యక్తి బంధువు అవుతాడు. ఓ పాఠశాలను నడిపే బాధ్యతను గజేంద్రకు జుగాండ్ అప్పగించాడు. కరోనా సమయంలో పాఠశాలలు మూతపడటం వల్ల.. ఆ భవనాన్ని అద్దెకు ఇచ్చాడు గజేంద్ర. ఈ విషయంపైనే ఇరువురి మధ్య వివాదం చెలరేగింది. దీంతో గజేంద్రపై దాడి చేశారు. ఈ ఘటనపై కేసు నమోదు చేసుకున్నట్టు గ్రేటర్ నోయిడా డీసీపీ విశాల్ పాండే తెలిపారు. దాడి చేసిన ఇద్దరినీ అరెస్టు చేసినట్లు చెప్పారు.
ఇదీ చదవండి: 1824లోనే ఆంగ్లేయులపై భారతీయుల తిరుగుబాటు
