BJP leader Son Killed: మధ్యప్రదేశ్ ఇందోర్లో దారుణ ఘటన జరిగింది. స్థానిక నేత, భాజపా కిసాన్ మోర్చా మహూ బ్లాక్ ప్రెసిడెంట్ ఉదల్ సింగ్ ఠాకుర్ కుమారుడు సుజిత్ ఠాకుర్(22) హత్యకు గురయ్యాడు. రెండు వర్గాల మధ్య ఘర్షణలో జోక్యం చేసుకోగా.. దుండగులు సుజిత్పై దాడి చేశారని పోలీసులు తెలిపారు. కిషన్గంజ్ పోలీస్ స్టేషన్ పరిధిలో బుధవారం రాత్రి ఈ ఘటన జరిగిందని వివరించారు. మరో నలుగురికి గాయాలయ్యాయని, ఒకరి పరిస్థితి విషమంగా ఉందని వెల్లడించారు. ఘటనా స్థలం వద్ద అదనపు సిబ్బందిని మోహరించినట్లు పేర్కొన్నారు.
ఇదీ జరిగింది: బోర్వెల్ తవ్వకానికి సంబంధించి కుల్దీప్ ఠాకూర్, రాజా వర్మ అలియాస్ రాజు ఖటిక్ వర్గాల మధ్య ఘర్షణ మొదలైందని పోలీసులు తెలిపారు. ఈ నేపథ్యంలోనే ఖటిక్, అతని అనుచరులు సుజిత్ తలపై ఐరన్ రాడ్లతో దాడి చేసినట్లు పేర్కొన్నారు. ఆస్పత్రికి తరలించేలోపే ప్రాణాలు కోల్పోయాడని, కుల్దీప్ పరిస్థితి కూడా విషమంగా ఉందని వెల్లడించారు. 'రాజా వర్మ, లోకేశ్ వర్మ, మాల్కేశ్ వర్మ, మన్ను, రోహిత్ బన్వారి, రాజ్ కపూర్, రాకేశ్ డాన్లపై కేసు నమోదు చేశాం. ప్రధాన నిందితుడు రాజు ఖటిక్ను అరెస్టు చేశాం. మిగతా వారి కోసం గాలిస్తున్నాం.' అని స్పష్టం చేశారు. ఈ ఘటన అనంతరం.. గ్రామంలో ప్రధాన నిందితుడి అక్రమ నిర్మాణాలను కూల్చివేసినట్లు పేర్కొన్నారు మధ్యప్రదేశ్ హోం మంత్రి నరోత్తమ్ మిశ్రా. నిందితుల్ని వదిలిపెట్టే ప్రసక్తే లేదని ఆయన ఉద్ఘాటించారు.
ఇవీ చూడండి: ఆ ఒక్క పిల్లితో రూ. 100 కోట్ల నష్టం.. ఎలా?
