Bipin Rawat funeral: భారత తొలి త్రిదళాధిపతి జనరల్ బిపిన్ రావత్, ఆయన సతీమణి మధులికా రావత్ల చితాభస్మం గంగమ్మ ఒడికి చేరింది. సంప్రదాయ పద్ధతుల్లో అన్ని కార్యక్రమాలు నిర్వహించి అస్థికలను ఉత్తరాఖండ్ హరిద్వార్లోని గంగానదిలో కలిపారు వారి కుమార్తెలు.
దిల్లీ కంటోన్మెంట్లోని బ్రార్ స్క్వేర్ శ్మశానవాటిక నుంచి రావత్ దంపతుల చితాభస్మాల్ని శనివారం ఉదయం సేకరించారు ఆయన కుమార్తెలు క్రితిక, తరిణి. అక్కడి నుంచి నేరుగా ఉత్తరాఖండ్లోని హరిద్వార్కు చేరుకున్నారు. నదీ తీరంలో వారి ఆత్మకు శాంతి చేకూరాలని, హిందూ సంప్రదాయం ప్రకారం అన్ని కార్యక్రమాలు పూర్తి చేసి అస్థికలను నదిలో కలిపారు.
ఈనెల 8న తమిళనాడులోని కూనూర్లో జరిగిన హెలికాప్టర్ ప్రమాదంలో సీడీఎస్ బిపిన్ రావత్ దంపతులు మరణించగా.. శుక్రవారం దిల్లీలోని బ్రార్ స్క్వేర్లో అధికారిక లాంఛనాలతో వారి అంత్యక్రియలు జరిగాయి. త్రివిధదళాలు 17 గన్ సెల్యూట్ చేశాయి. వీరుడికి యావత్ దేశం కన్నీటి వీడ్కోలు పలికింది.
ఇదీ చూడండి:
