బంగాల్లో అధికార తృణమూల్ కాంగ్రెస్, ప్రతిపక్ష భాజపా మధ్య మరోమారు మాటల యుద్ధం నెలకొంది. టీఎంసీ ఎంపీ కల్యాణ్ బెనర్జీ.. ఆర్థిక మంత్రి నిర్మలా సీతారామన్ను "విషపూరిత సర్పం"తో పోల్చడంపై భాజపా శ్రేణులు తీవ్ర అభ్యంతరం వ్యక్తం చేశారు. టీఎంసీ సభ్యులు అర్థం లేని మాటలు మాట్లాడుతున్నారని.. ముఖ్యమంత్రి మమతా బెనర్జీ వారిని అదుపులో పెట్టడంలో విఫలమయ్యారని ఆరోపించారు.
'ఆర్థికమంత్రి ఓ కాల నాగు'
పెరుగుతున్న ఇంధన ధరలు, రైల్వే ప్రైవేటీకరణకు నిరసనగా బంకురలో ర్యాలీ నిర్వహించారు కల్యాణ్ బెనర్జీ. ఈ నేపథ్యంలో నిర్మల రాజీనామా చేయాలని డిమాండ్ చేశారు.
"ప్రజలను కాటేసి, చంపే కాల నాగు లాగే.. ఆర్థికమంత్రి విధానాలు దేశ ఆర్థిక వ్యవస్థను చంపేస్తున్నాయి. ప్రపంచంలోనే అత్యంత దారుణమైన ఆర్థికమంత్రి మన దేశంలో ఉన్నారు. నిర్మల వెంటనే రాజీనామా చేయాలి."
-- కల్యాణ్ బెనర్జీ, తృణమూల్ కాంగ్రెస్ ఎంపీ.
ప్రధానమంత్రి నరేంద్ర మోదీపైనా తీవ్ర విమర్శలు చేశారు కల్యాణ్. నూతన భారతాన్ని సృష్టిస్తానని వాగ్దానం చేసిన మోదీ.. దేశ జీడీపీ వృద్ధి రేటును అమాంతం తగ్గించి.. ఇచ్చిన మాటను నిలబెట్టుకున్నారని ఎద్దేవా చేశారు.
'అవన్నీ అర్థం లేని మాటలు...'
కల్యాణ్ బెనర్జీ వ్యాఖ్యలను భాజపా శ్రేణులు తిప్పికొట్టారు. కల్యాణ్ బెనర్జీపై కేసు వేస్తామని తెలిపారు.
"టీఎంసీ నిలువెల్లా అవినీతి మయమైపోయింది. పార్టీ అంతర్గత కలహాలతో తీవ్ర ఒత్తడికి లోనయ్యి.. నేతలు అర్థంలేని మాటలు మాట్లాడుతున్నారు. పార్టీలో పరిస్థితులను కప్పిపుచ్చడానికి ఇలాంటి వ్యాఖ్యలు చేస్తున్నారు. మేము ఇలాంటివి పట్టించుకోము."
-దిలీప్ ఘోష్,భాజపా రాష్ట్ర అధ్యక్షుడు.
కల్యాణ్ బెనర్జీపై తీవ్రస్థాయిలో ధ్వజమెత్తారు భాజపా అధికార ప్రతినిధి సంబిత్ పాత్ర.
"దుర్గామాతను పూజించే రాష్ట్రం నుంచి వచ్చిన వ్యక్తి కల్యాణ్. మమతా బెనర్జీ కూడా ఓ మహిళే. ఆమె వెంటనే ఆయనపై చర్యలు చేపట్టాలి. కానీ మమతా బెనర్జీ అలా చేస్తారని అనుకోవడం లేదు."
-- సంబిత్ పాత్ర, భాజపా ప్రతినిధి.
ఇదీ చూడండి:- కొవ్వొత్తుల కర్మాగారంలో పేలుడు.. ఏడుగురు మృతి
