కరోనా మహమ్మారికి వ్యాక్సిన్ అందుబాటులోకి రావాలంటే చాలా సమయం పడుతుందని పేర్కొన్నారు శాస్త్రవేత్తలు. అందుకే ఇతర వ్యాధులకు వినియోగించిన పాత ఔషధాల సాయంతో ట్రయల్స్ చేస్తున్నామని తెలిపారు. ఆ ప్రయత్నాలు కొవిడ్ను నిరోధించే ఆశను పెంచుతున్నాయని స్పష్టం చేశారు. ఈ విషయంలో యాంటివైరల్ డ్రగ్ రెమిడెసివిర్ ముందంజలో ఉన్నట్లు చెప్పారు.
ప్రస్తుతం పలు రకాల ఔషధాలు క్లినికల్ ట్రయల్స్లో ఉన్నాయని, అందులో కరోనా రోగులు వేగంగా కోలుకునేందుకు రెమిడెసివిర్ ఉపయోగపడుతోందని పేర్కొన్నారు నిపుణులు.
కొవిడ్-19 చికిత్స కోసం 130కిపైగా ఔషధాలు పరిశోధన దశలో ఉన్నాయి. అందులో కొన్ని వైరస్ వృద్ధిని అడ్డుకోగా, మరికొన్ని రోగనిరోధక శక్తి అతి స్పందనను నిరోధిస్తున్నాయని అమెరికాకు చెందిన మిల్కెన్ ఇన్స్టిట్యూట్ పేర్కొంది.
" ప్రస్తుతం ఒకే ఒక ప్రభావవంతమైన విధానం ఉంది. ఇతర వ్యాధుల ఔషధాలను కొవిడ్-19కు ఉపయోగిస్తూ.. వాటితో మెరుగైన ఫలితాలు సాధిచడం ఒక్కటే ముందున్న మార్గం. ఉదాహరణకు రెమిడెసివిర్. ఆ డ్రగ్ కరోనా రోగులు త్వరగా కోలుకునేందుకు సాయపడుతోంది. తీవ్ర అనారోగ్యానికి గురైన వారిలోనూ మరణాల రేటును తగ్గిస్తోంది. కొత్త డ్రగ్ అభివృద్ధి చేసేందుకు సమయం లేదు. అందుకోసం 5-10 ఏళ్లు పడుతుంది. కాబట్టి ప్రస్తుతం ఉన్న వాటినే వినియోగించాలి. ప్రస్తుతం ఉన్న మందుల్లో ఏవి ప్రభావవంతగా ఉన్నాయో తెలుసుకునేందుకు క్లినికల్ ట్రయల్స్ నిర్వహించాలి. అలాంటి వాటిని గుర్తిస్తే.. డ్రగ్ కంట్రోల్ విభాగం నుంచి అనుమతులు తీసుకోవచ్చు."
– రామ్ విశ్వకర్మ, డైరెక్టర్ (ఐఐఐఎం - సీఎస్ఐఆర్, జమ్ము)
కరోనా వైరస్పై రెమిడెసివిర్ డ్రగ్ క్లినికల్ ట్రయల్స్కు గిలీడ్ సైన్సెస్ అడిగిన వెంటనే.. అమెరికా ఆహార ఔషధ నియంత్రణ సంస్థ (ఎఫ్డీఏ) అనుమతులు ఇచ్చినట్లు గుర్తు చేశారు రామ్. రెమిడెసివిర్తో పాటు ఫవిపిరవిర్ కూడా ముందంజలో ఉన్నట్లు చెప్పారు. ప్రస్తుతం ఈ డ్రగ్ క్లినికల్ ట్రయల్స్కు జపాన్లో అనుమతి ఇచ్చారు.
భారత్ కీలక పాత్ర…
ఫవిపిరవిర్ తయారీ కోసం హైదరాబాద్లోని ఇండియన్ ఇన్స్టిట్యూట్ ఆఫ్ కెమికల్ టెక్నాలజీ (ఐఐసీటీ) కూడా సాంకేతికతను అభివృద్ధి చేసినట్లు.. సీఎస్ఐఆర్ డైరెక్టర్ జనరల్ శేఖర్ ముండే ఇటీవల ప్రకటించారు. ఫవిపిరవిర్, రెమిడెసివిర్, యాంటీ ఇన్ల్ఫమేటరీ డ్రగ్ కొల్చిసిన్లపై సీఎస్ఐఆర్ క్లినికల్ ట్రయల్స్ నిర్వహిస్తున్నట్లు తెలిపారు.
