సూపర్ స్టార్ రజనీ కాంత్ తన అభిమాన సంఘం జిల్లా కార్యదర్శులతో నేడు సమావేశం కానున్నారు. ఉదయం 10 గంటలకు చెన్నైలోని రాఘవేంద్ర కల్యాణ మండపంలో ఈ భేటీ జరగనున్నట్లు 'రజనీ మక్కల్ మంద్రమ్' వర్గాలు ధ్రువీకరించాయి. దాదాపు 50 మంది నాయకులు ఈ సమావేశానికి హాజరుకానున్నట్లు సమాచారం.
రజనీ రాజకీయాల్లోకి రావాలని కోరుకుంటున్న వారిలో ఒకరైన తుగ్లక్ పత్రిక సంపాదకులు గురుమూర్తితో వారం కిందట అమిత్ షా సమావేశం అయ్యారు. ఈ నేపథ్యంలో తమిళనాట రాజకీయాలు చకచకా మారిపోతున్నట్లు కనిపిస్తున్నాయి.
ఇప్పటివరకు స్తబ్దుగా ఉన్న తమిళ భాజపా నాయకులు కూడా రజనీతో కలిసి పని చేసేందుకు ఆసక్తి చూపిస్తున్నారు. సూపర్స్టార్ మద్దుతు కూడగట్టే దిశగా అమిత్ షాకు సూచనలు ఇస్తున్నారు. వచ్చే అసెంబ్లీ ఎన్నికల్లో తమిళనాట భాజపా జెండా పాతాలని చూస్తోంది.
కొద్దిరోజుల కిందట రజనీ కాంత్ రాజకీయ రంగ ప్రవేశం, ఆరోగ్య పరిస్థితిపై ఓ ప్రకటన విడుదల అయ్యింది. ఆ లేఖపై స్వయంగా సూపర్ స్టార్ ప్రతినిధులు వివరణ ఇచ్చుకున్నారు. ఏదేమైనా తమిళనాడు అసెంబ్లీ ఎన్నికలు దగ్గరపడుతున్న వేళ.. రజనీ ప్రకటించబోయే నిర్ణయం కీలకంకానుంది.
ఇదీ చూడండి:'చెన్నై వలంటీర్ నుంచి రూ. 100కోట్లు వసూలు చేస్తాం'
