తూర్పు లద్దాఖ్లోని గల్వాన్ లోయలో హింసాత్మక ఘటన నేపథ్యంలో విదేశీ వ్యవహారాలపై ఏర్పాటైన పార్లమెంటరీ స్థాయీ సంఘం(పార్లమెంటరీ స్టాండింగ్ కమిటీ) సమావేశం నిర్వహించాలని పలువురు విపక్ష పార్టీల ఎంపీలు డిమాండ్ చేశారు. చైనా సైనికులతో జరిగిన ఘర్షణలో 20 మంది భారత జవాన్లు ప్రాణాలు కోల్పోయిన అంశంపై విదేశాంగ శాఖ, రక్షణ శాఖ కార్యదర్శలు సహా ఇతర ఉన్నతాధికారులు పూర్తి వివరాలను ప్యానెల్కు వివరించాలని కోరారు.
" జాతీయ ప్రాముఖ్యత ఉన్న సమస్య కాబట్టి సమావేశాన్ని వీలైనంత త్వరగా నిర్వహించాలి. చైనాతో హింసాత్మక ఘటనపై విదేశాంగ శాఖ, రక్షణ శాఖ కార్యదర్శులు ప్యానెల్కు పూర్తి వివరాలు వెల్లడించాలి. ఈ ఘటనపై పూర్తి అవగాహన ఉన్న ఇతర ప్రభుత్వ ఉన్నతాధికారులను సైతం భేటీకి అనుమతించాలి."
- ఎన్కే ప్రేమ్చంద్రన్, ఆర్ఎస్పీ ఎంపీ
రాజకీయలు మానుకోవాలి..
విపక్ష ఎంపీల డిమాండ్ను రాజకీయ చర్యగా పేర్కొన్నారు పలువురు అధికార పార్టీ ఎంపీలు. కరోనా వైరస్ విజృంభిస్తున్న వేళ ఈ సమావేశం నిర్వహించటం సాధ్యం కాదని తెలిపారు. విపత్కర పరిస్థితుల్లో అన్ని రాజకీయ పార్టీలకు చెందిన నేతలు ప్రభుత్వానికి మద్దతుగా ఏకతాటిపైకి రావాలని కోరారు భాజపా ఎంపీ మీనాక్షిలేఖి. కరోనా వైరస్ విజృంభిస్తున్న అంశంపై ఎందుకు పార్లమెంటరీ స్థాయీ సంఘం సమావేశానికి ఎందుకు డిమాండ్ చేయలేదని ప్రశ్నించారు. ప్రస్తుత డిమాండ్ వెనక రాజకీయ దురుద్దేశం ఉందని ఆరోపించారు.
వీడియో కాన్ఫరెన్స్ ద్వారా!
విపక్ష ఎంపీల డిమాండ్ల మేరకు పార్లమెంటరీ స్థాయీ సంఘం సమావేశం వీడియో కాన్ఫరెన్స్ ద్వారా నిర్వహించే అవకాశాలపై సెక్రటరీ జనరల్స్తో ఆరాతీశారు లోక్సభ స్పీకర్ ఓం బిర్లా, రాజ్యసభ ఛైర్మన్ వెంకయ్య నాయుడు.
ఇదీ చూడండి: భారత్- చైనా సరిహద్దు సమస్యకు అసలు కారణమేంటి?
