సరిహద్దులో ఎలాంటి సవాళ్లనైనా ఎదుర్కొనేందుకు సర్వసన్నద్ధంగా ఉంది భారత వాయుసేన. రాత్రివేళలోనూ లేహ్ సరిహద్దులో యుద్ధ విమానాలతో గస్తీ నిర్వహిస్తోంది. శత్రువులు ఏ సమయంలో దుశ్చర్యలకు పాల్పడినా దీటుగా తిప్పికొట్టేందుకు సిద్ధమైంది.
మిగ్-29, అపాచీ, చినూక్, ఎంఐ-17, తేలికపాటి ధ్రువ్ యుద్ధ విమానాలు లేహ్ ఎయిర్బేస్ వద్ద రాత్రివేళ చక్కర్లు కొడుతున్నట్లు అధికారిక వర్గాలు పేర్కొన్నాయి.
"పరిస్థితులు ఏవైనా రాత్రివేళ కూడా యుద్ధవిమానాలను రంగంలోకి దింపేందుకు సిద్ధం. శిక్షణ పొందిన మన పైలట్లకు నైపుణ్యంతో పాటు వృత్థి నిబద్ధత కూడా ఎక్కువ. ఈ ప్రాంతంలో చీకటి వేళలోనూ ఆపరేషన్ నిర్వహించగలరు." అని భారత వాయుసేన అధికారి తెలిపారు.
లేహ్ ప్రాంతంలో రాత్రివేళ కార్యకలాపాలు నిర్వహించడం అంత సులభం కాదు. మిగతా ప్రాంతంతో పోల్చితే ఈ భూభాగం పూర్తిగా భిన్నం. ఎత్తైన ప్రదేశాలు, ఆక్సిజన్ కొరత, అతి తక్కువ ఉష్ణోగ్రత వంటి క్లిష్ట పరిస్థితులుంటాయి. ఈ శిఖరాల్లో చీకటి వేళ కార్యకలాపాలు నిర్వహించడమే అతిపెద్ద సవాల్. అయితే భారత వాయుసేన పైలట్లు శత్రువుతో పాటు కఠిన పరిస్థితులను ఎదుర్కొనేందుకు సిద్ధమయ్యారు.
వీటితో పాటు శీతాకాలంలో కురిసే మంచువల్ల దృశ్యమానత పరంగా ఎదురయ్యే కొత్త సవాళ్లను ఎదుర్కొనేందుకు వాయుసేన సన్నద్దమవుతోంది.
