పత్రికలు, మీడియా సంస్థలకు కేంద్ర రాష్ట్ర ప్రభుత్వాలు భారీగా బకాయి పడ్డాయని సుప్రీంకోర్టుకు భారతీయ వార్తాపత్రికల సంఘం (ఐఎన్ఎస్) నివేదించింది. ప్రభుత్వ ప్రచార విభాగాలు యాడ్లకు సంబంధించి సుమారు రూ.1,800 కోట్లను చెల్లించలేదని వివరించింది.
ఈ సంక్షోభ సమయంలో పత్రికా యాజమాన్యాలకు ఈ డబ్బులు వస్తాయో లేదోనని సుప్రీంకోర్టు ఎదుట ఆందోళన వ్యక్తం చేసింది ఐఎన్ఎస్. మీడియా పరిశ్రమ ఎదుర్కొంటున్న ఆర్థిక సమస్యలపై న్యూస్ బ్రాడ్కాస్టర్స్ అసోసియేషన్ (ఎన్బీఏ) అందించిన వివరాలను కోర్టుకు సమర్పించింది. ఎన్బీఏ కూడా వేరుగా మరో ప్రమాణ పత్రాన్ని దాఖలు చేసింది.
"పరిశ్రమ అంచనాల ప్రకారం.. మీడియా సంస్థలకు డైరెక్టరేట్ ఆఫ్ అడ్వర్టైసింగ్ అండ్ విజువల్ పబ్లిసిటీ (డీఏవీపీ) రూ.1,500 నుంచి రూ.1,800 కోట్లు బకాయి పడింది. ఇందులో రూ.900 కోట్ల వరకు పత్రికా సంస్థలకు చెందినవే. చాలా నెలలుగా ఇవి పెండింగ్లో ఉన్నాయి. ఈ పరిస్థితుల్లో ప్రభుత్వం చెల్లిస్తుందనే నమ్మకం కూడా లేదు."
- ఐఎన్ఎస్
దేశంలోని మూడు జర్నలిస్టు సంఘాలు దాఖలు చేసిన వ్యాజ్యంపై ఐఎన్ఎస్, ఎన్బీఏకు నోటీసులు జారీ చేసింది జస్టిస్ ఎన్వీ రమణ నేతృత్వంలోని ధర్మాసనం. వీటికి స్పందనగా ఎన్బీఏ, ఐఎన్ఎస్ వివరణ ఇచ్చాయి.
"కరోనా వ్యాప్తి, లాక్డౌన్ వల్ల మీడియా పరిశ్రమ తీవ్రంగా ప్రభావితమైంది. మీడియా హౌసులన్నీ పూర్తిగా ఆర్థిక సంక్షోభంలో కూరుకుపోయాయి. ఈ అనుకోని విపత్తు సమయంలోనూ వార్తాసంస్థలకు ప్రభుత్వం నుంచి ఎటువంటి ఆర్థిక సాయం దక్కలేదు. ఆదుకునేందుకు కనీసం చర్యలు కూడా చేపట్టడం లేదు."
- ఎన్బీఏ ప్రమాణ పత్రం సారాంశం
మరిన్ని సమస్యలు..
"ప్రభుత్వ ప్రకటనలు 80- 85 శాతం తగ్గిపోయాయి. ఇతర రంగాలకు చెందిన ప్రకటనలు కూడా 90 శాతం పడిపోయాయి. ఎఫ్ఎంసీజీ, ఈ- కామర్స్, ఫినాన్స్, వాహనాల ప్రకటనలపైనే పత్రికలు భారీగా ఆధారపడతాయి. ఇవన్నీ ప్రస్తుత లాక్డౌన్ కారణంగా ప్రకటనలు ఇవ్వటం లేదు. ఆన్లైన్ వేదికల్లోనే యాడ్లు ఇస్తుండటమూ పత్రికలపై ప్రభావం చూపింది.
ప్రకటనలు లేకపోవటం వల్ల చాలా పత్రికలు పేజీల సంఖ్యను భారీగా తగ్గించాయి. చాలా మంది ఇతరులను ఇళ్లలోకి రానిచ్చేందుకు నిరాకరిస్తున్నారు. ఫలితంగా కొన్ని సంస్థలు పూర్తిగా ముద్రణను నిలిపేశాయి. " అని ఐఎన్ఎస్ వివరించింది.
"పత్రికల ఆదాయం ముఖ్యంగా ప్రకటనలపై ఆధారపడి ఉంటుంది. పత్రిక అమ్మకం ద్వారా వచ్చే ఆదాయం చాలా స్వల్పం. ప్రభుత్వాలే కాకుండా డబ్బును ఆదా చేసేందుకు రాజకీయ పార్టీలు కూడా ప్రకటనలను నిలిపేయాలని డిమాండ్ చేస్తున్నారు. ఈ పరిస్థితుల్లో జర్నలిస్టు సంఘాలు వేసిన వ్యాజ్యాన్ని కొట్టివేయాలి" అని ఐఎన్ఎస్తోపాటు ఎన్బీఏ సుప్రీంకోర్టును కోరింది.
రద్దు చేయాలని వ్యాజ్యం..
నేషనల్ అలయన్స్ ఆఫ్ జర్నలిస్ట్స్, దిల్లీ యూనియన్ ఆఫ్ జర్నలిస్ట్స్, బృహన్ ముంబయి యూనియన్ ఆఫ్ జర్నలిస్టు సుప్రీంకోర్టులో ఇటీవల వ్యాజ్యాన్ని దాఖలు చేశాయి. లాక్డౌన్ కారణంగా మీడియా సంస్థలు తమ జర్నలిస్టులను తీసేస్తున్నారని.. జీతాల్లో కోత, సెలవులపై పంపిస్తున్నారని ఆరోపించాయి. మార్చి 25 తర్వాత అన్ని మీడియా సంస్థల యాజమాన్యాలు ఇచ్చిన ఆదేశాలను రద్దు లేదా నిలుపుదల చేయాలని వ్యాజ్యంలో కోరాయి.
