సాంకేతిక సహాయం చేస్తామంటూ మైక్రోసాఫ్ట్ ఉద్యోగులను లక్ష్యంగా చేసుకొని కుంభకోణానికి పాల్పడిన ఆరు సంస్థల నుంచి రూ.190 కోట్లు విలువైన ఆస్తులను కేంద్ర దర్యాప్తు బృందం(సీబీఐ) సీజ్ చేసింది. సెప్టెంబర్ 17న నిర్వహించిన ఈ సోదాల్లో ఆస్తులతో పాటు 55 లక్షల విలువైన బంగారం, రూ.25 లక్షల నగదు, అనేక డిజిటల్ ఆధారాలను స్వాధీనం చేసుకుంది. ఈ కేసుకు సంబంధించి అధికారిక ప్రకటన విడుదల చేసింది సీబీఐ.
కుంభకోణం ఏంటంటే...
మాల్వేర్ ఉందని వినియోగదారులకు పాప్-అప్ సందేశాలను పంపించి కంప్యూటర్లలోకి చొరబడేందుకు నేరస్థులు ప్రయత్నించారని సీబీఐ అధికారులు తెలిపారు. పాప్-అప్లో ఇచ్చిన నెంబర్కు డయల్ చేస్తే.. కాల్ సెంటర్ ఎగ్జిక్యూటివ్ భారీగా నగదు డిమాండ్ చేస్తున్నారని చెప్పారు. మాల్వేర్ను తొలగిస్తామని చెప్పి.. అనవసర సాఫ్ట్వేర్లను ఇన్స్టాల్ చేసినట్లు వెల్లడించారు.
కేసుకు సంబంధించి జైపుర్, దిల్లీ, నోయిడా, గురుగ్రామ్, ఫరీదాబాద్, మైన్పురీలోని ప్రైవేటు కంపెనీల కార్యాలయాలు, నిందితుల ఇళ్లలో సోదాలు నిర్వహించినట్లు వివరించారు. మరింత విచారణ కొనసాగుతోందని తెలిపారు.
సీబీఐ చేపట్టిన దర్యాప్తును అమెరికా న్యాయ శాఖ ప్రశంసించిందని అధికారులు తెలిపారు. ఇలాంటి నేరాల్లో విచారణ కోసం.. అమెరికాతో పాటు భారత్కు సన్నిహితంగా ఉండే దేశాల్లోని దర్యాప్తు సంస్థలతో కలిసి పనిచేస్తున్నట్లు చెప్పారు.
