చూపు లేకపోయినా ఫోన్​లో క్యాబ్ బుకింగ్​, ఫుడ్ ఆర్డర్లు- రోజూ జిమ్​లో వ్యాయామం

Aziz Minat Blind Man Success Story : కంటి చూపులేకపోయినా కుంగిపోలేదు ఆ యువకుడు. కష్టపడి చదివి బ్యాంకు ఉద్యోగాన్ని సాధించారు. సాంకేతికతను ఉపయోగించి క్యాబ్​ను బుక్ చేసుకోవడం, ఆన్​లైన్​ ఫుడ్​ డెలివరీ యాప్​ల ద్వారా ఆర్డర్లు పెట్టుకోవడం వంటి పనులను సులువుగా చేసేస్తున్నారు. రోజుకు దాదాపు 45 నిమిషాల పాటు వ్యాయామం సైతం చేస్తున్నారు. ఆయనే గుజరాత్ అహ్మదాబాద్​​కు చెందిన అజీజ్​ మినాట్​.

అజీజ్ మినాట్​ పుట్టిన కొన్నాళ్లకు కంటి చూపును కోల్పోయారు. ఈ విషయం తెలిసి కుటుంబసభ్యులు తీవ్రంగా బాధపడ్డారు. అజీజ్​కు మూడేళ్ల వయసు ఉన్నప్పుడు ఆయన కుటుంబం సూరత్​ నుంచి అహ్మద్​బాద్​కు మకాం మార్చింది. అనంతరం అక్కడే ఆశ్రమ్ రోడ్​లో ఉన్న అంధుల పాఠశాలలో అజీజ్​ను చేర్పించారు. అజీజ్​ సొంతంగా తన పనులు తానే చేసుకోవాలని ఆయన కుటుంబ సభ్యులు ఆశించారు. అందుకోసమే అజీజ్​ను 12వ తరగతి వరకు హాస్ట​ల్​లోనే ఉంచి చదివించారు. అలా కష్టపడి ఉన్నత చదువులు చదివి అజీజ్.. ప్రభుత్వ బ్యాంకులో డిప్యూటీ మేనేజర్​గా ఉద్యోగం సాధించారు.

భార్యతో అజీజ్ మినాట్

"మా హాస్టల్ నుంచి స్కూల్​కు ఒక కిలోమీటర్ దూరం ఉండేది. ఆ సమయంలో ట్రాఫిక్ తక్కువ ఉండడం వల్ల నేను సులువుగా స్కూల్​కు వెళ్లేవాడిని. స్కూల్​లో 7వ తరగతి వరకు బ్రెయిలీ లిపిలో పుస్తకాలు దొరికేవి. కానీ 8,9,10,11వ తరగతుల్లో సిలబస్ ఎక్కువగా ఉండడం వల్ల పాఠాలను బ్రెయిలీ లిపిలో చదవలేకపోయేవాడిని. దాని వల్ల క్యాసెట్లలో పాఠాలను ఆడియో రికార్డింగ్ చేసి వినేవాడిని."
--అజీజ్ మినాట్​, అంధుడు

ఉద్యోగం వచ్చిన తర్వాత అజీజ్​.. అమీనా అనే ఓ అంధురాలిని వివాహం చేసుకున్నారు. ఆమె అంధురాలైనప్పటికీ ఓ మల్టీ నేషనల్ కంపెనీలో ఉద్యోగం చేస్తున్నారు. ప్రస్తుతం వర్క్ ఫ్రమ్ హోమ్ చేస్తున్న ఆమె.. ప్రతి నాలుగు నెలలకొకసారి దిల్లీలోని ఆఫీసుకు వెళ్లి రావాలి. అయినా అమీనా ఒంటరిగానే దిల్లీ వెళ్లి క్షేమంగా ఇంటికి చేరుకుంటున్నారు.

జిమ్ చేస్తున్న అజీజ్ మినాట్

తనకు రష్యన్, ఫ్రెంచ్ సాహిత్యం అంటే ఇష్టమని అజీజ్ చెబుతున్నారు. ఆంగ్ల సాహిత్యంలో ఆయన బ్యాచిలర్ డిగ్రీ పట్టాను సైతం పొందారు. అంతేగాక అజీజ్​ తన ఫోన్​లో సెల్ఫీలను సైతం తీసుకుంటారు. వాటిని సోషల్ మీడియాలో పోస్ట్ చేస్తున్నారు. ట్విట్టర్, ఫేస్‌బుక్, ఆడియో యాప్​లను వాడుతుంటారు. సామాజిక సమస్యలపై సోషల్ మీడియాలో స్పందిస్తుంటారు.

ఈటీవీ భారత్ యాప్​ను వాడుతున్న అజీజ్​

"రోజుకు 5 గంటలకు మించి నేను చదవలేను. అలా చదవాలన్నా గంటకు 15 నిమిషాల విరామం కావాలి. నేను సాధారణంగా రోజుకు 8 నుంచి 9 గంటలు చదువుకునేవాళ్లలా కాదు. నేను అంతసేపు చదవలేను. యూపీఎస్సీ చదవాలనుకున్నప్పుడు కూడా నేను 9 గంటలు చదవాలనుకున్నాను. కానీ.. అది నా వల్ల కాలేదు. అందుకే యూపీఎస్సీని వదిలేశా."
--అజీజ్ మినాట్​, అంధుడు

దేశ రాజకీయాలపై తనకు చాలా ఆసక్తి ఉందని అజీజ్ అంటున్నారు. తాను ప్రస్తుతం బ్యాంకులో ఉదయం 9 నుంచి సాయంత్రం 7 గంటల వరకు పని చేస్తున్నానని తెలిపారు. నెలాఖరులో బ్యాంకులో పని ఎక్కువగా ఉంటుందని.. ఆ సమయంలో కొన్నిసార్లు రోజుకు 12 గంటలు పనిచేయాల్సి వస్తుందని అన్నారు.

తనకు కంటి చూపు లేకపోవడం వల్ల తన తల్లిదండ్రులు ఎక్కువ అవమానాలు పడ్డారని అజీజ్ తెలిపారు. తాను ఒంటరిగా ప్రభుత్వ ఆర్​టీసీ బస్సులో కాలేజీకి వెళ్లేవాడినని చెప్పారు. స్నేహితులు ఎవరూ తనను తక్కువగా చూడలేదని అజీజ్ అన్నారు. జర్నలిజం చదవాలని నిర్ణయించుకున్నానని.. అది సాధ్యం కానప్పుడు నిరాశ చెందానని చెప్పారు.