AIMIM Gujarat election: 2022 చివర్లో జరగనున్న గుజరాత్ శాసనసభ ఎన్నికల్లో ఎంఐఎం అధిక స్థానాల్లో విజయం సాధిస్తుందని ఆ పార్టీ అధినేత అసదుద్దీన్ ఒవైసీ ధీమా వ్యక్తం చేశారు. తమ పార్టీ ఇప్పటికే అసెంబ్లీలో ప్రజావాణిని వినిపిస్తోందని, పురపాలక సంస్థల ఎన్నికల్లోనూ చెప్పుకోదగ్గ స్థాయిలో కార్పొరేటర్లు గెలిచారని గురువారం అహ్మదాబాద్ పర్యటన అనంతరం ఈటీవీ భారత్తో ప్రత్యేకంగా మాట్లాడిన సందర్భంగా చెప్పారు. ఇటీవల యూపీ ఎన్నికల్లో ఎంఐఎం ప్రభావం చూపలేకపోవడంపైనా స్పందించారు ఒవైసీ.
"రానున్న నెలల్లో గుజరాత్లో విస్తృతంగా పర్యటిస్తా. ఇక్కడి ప్రజల్ని కలుస్తా. గుజరాత్ ప్రజలు ఇప్పటికే మా పార్టీపై ప్రేమ కనబరిచారు. మమ్మల్ని అసెంబ్లీకి పంపారు. యూపీలో ఎంఐఎం గెలవలేకపోయింది. కానీ.. బిహార్లో గెలిచింది. గుజరాత్ పురపాలక సంస్థల ఎన్నికల్లోనూ ఎంఐఎం అభ్యర్థులు కార్పొరేటర్లుగా గెలిచారు. యూపీ ఎన్నికల కోసం మేము 18 రోజుల ముందే రంగంలోకి దిగాం. సమయం సరిపోక ఎన్నికలకు సరిగా సన్నద్ధం కాలేకపోయాం. కానీ ఈసారి అలా కాదు. గుజరాత్ ఎన్నికలకు మేము పూర్తి సిద్ధంగా ఉన్నాం. తప్పకుండా గెలుస్తాం." అని విశ్వాసం వ్యక్తం చేశారు ఒవైసీ.
కంచుకోటలు ఉండవ్!: గుజరాత్.. భాజపాకు కంచుకోట అనే వాదనను తోసిపుచ్చారు ఒవైసీ. "ఏ పార్టీకీ అలా కంచుకోటలు ఉండవు. గత 27 ఏళ్లుగా భాజపా గెలుస్తోంది అంటే.. అందుకు కారణం కాంగ్రెస్ వైఫల్యమే. గుజరాత్లో మంచి నాయకత్వాన్ని తయారు చేసి, మా వాణి రాష్ట్ర శాసనసభకు చేరేలా చేయడమే మా లక్ష్యం" అని స్పష్టం చేశారు ఎంఐఎం అధినేత. శ్రీరామ నవమి సందర్భంగా గుజరాత్లోని వేర్వేరు చోట్ల హింస చెలరేగడంపై స్పందించారు. అవాంఛిత ఘటనల్ని నివారించడంలో రాష్ట్ర ప్రభుత్వం విఫలమైందని మండిపడ్డారు.
