2013 పట్నా గాంధీ మైదాన్లో వరుస బాంబు పేలుళ్ల కేసులో ఎన్ఐఏ ప్రత్యేక కోర్టు దోషులకు శిక్ష ఖరారు చేసింది. మొత్తం 9 దోషుల్లో నలుగురికి మరణశిక్ష విధించింది. ఇద్దరికి జీవితఖైదు, మరో ఇద్దరికి 10 ఏళ్లు, ఒకరికి ఏడేళ్ల జైలు శిక్ష వేసింది.
2013 అక్టోబర్ 27న.. నాటి భాజపా ప్రధాని అభ్యర్థి మోదీతో పాటు అనేక మంది కమలదళ నేతలు బిహార్లో ర్యాలీలు నిర్వహించాల్సి ఉంది. ఈ తరుణంలో వరుస పేలుళ్లు రాష్ట్రాన్ని కుదిపేశాయి. మోదీ ర్యాలీ నిర్వహించాల్సిన హుంకర్లోని గాంధీ మైదాన్ లక్ష్యంగా ఈ పేలుళ్లు జరిగాయి. అనంతరం పట్నా రైల్వే స్టేషన్లోనూ పేలుళ్లు సంభవించాయి. ఈ ఘటనల్లో మొత్తం ఆరుగురు ప్రాణాలు కోల్పోయారు. 84మంది గాయపడ్డారు.
2013 నవంబర్ 6న ఈ కేసు దర్యాప్తును ఎన్ఐఏ చేపట్టింది. 2014 ఆగస్టులో 11మందిపై ఛార్జ్షీట్ దాఖలు చేసింది. వీరిలో 10మంది సిమి(స్టూడెంట్స్ ఇస్లామిక్ మూవ్మెంట్ ఆఫ్ ఇండియా)కి చెందినవారు. మరో వ్యక్తి మైనర్ కావడం వల్ల అతడిని మూడేళ్ల పాటు జువెనైల్ హోంలో ఉంచారు.
దోషులను హైదర్ అలీ, నోమన్ అన్సారీ, మహమ్మద్ ముజిబుల్లా అన్సారీ, ఇమ్తియాజ్ ఆలమ్, అహ్మెద్ హుస్సైన్, ఫక్రుద్దిన్ మహమ్మద్, ఫిరోజ్ అస్లామ్, ఇమ్తియాజ్ అన్సారీ, మహమ్మద్ ఇఫ్తికర్ ఆలమ్, అజారుద్దిన్ ఖురేషి, తౌఫిక్ అన్సారీగా గుర్తించారు.
ఇదీ చూడండి:- యోగికి ఉగ్రవాదుల హెచ్చరిక.. '46 రైల్వే స్టేషన్లలో బాంబు పేలుళ్లు'!
