Award Received By Conductor Jhansi: గాజువాకలో ఆర్టీసీ కండక్టర్గా విధులు నిర్వహిస్తూ.. 'పల్సర్ బైక్ మీద..' అనే పాటతో ప్రాచుర్యం పొందిన డాన్సర్ ఝాన్సీ, కొరియోగ్రాఫర్ చదలవాడ రమేష్బాబులను విశాఖ గణేష్ సేవా సమితి సత్కరించింది. గురు పూజోత్సవం సందర్భంగా గురు శిష్య పురస్కారాన్ని అందజేసింది. పురస్కార గ్రహీతలు చదలవాడ రమేష్ బాబు, ఝాన్సీలు మాట్లాడుతూ తమ ప్రతిభను గుర్తించి గురుపూజోత్సవం రోజు సత్కరించి అవార్డులను ప్రధానం చేసినందుకు కృతజ్ఞతలు తెలిపారు.
"తెలుగు రాష్ట్రాలతో పాటు దేశ వ్యాప్తంగా అనేక మంది ప్రజల మన్ననలు పొందేందుకు ఆశీస్సులు కావాలి. ఇప్పటికే అనేక సంవత్సరాలుగా మా కళాకారుల బృందం అనేక ప్రదర్శనలు ఇచ్చింది, కళాకారులు మెరుగ్గా ఉంటేనే ఆయా ప్రాంతాలు సస్యశ్యామలంగా ఉంటాయి. అయితే ప్రతిభాపాటవాలు ఉంటే ఎప్పటికైనా తమకు గుర్తింపు లభిస్తుందని చెప్పడానికి తాజాగా మాకు లభించిన ఆదరణే నిదర్శనం. ప్రభుత్వం కూడ కళాకారులని ఆదుకోవాలి". - చదలవాడ రమేష్ బాబు, కండక్టర్ ఝాన్సీ గురువు
"ఒక పక్క ఉద్యోగం చేస్తూ.. మరో పక్క కుటుంబాన్ని పోషిస్తూ డాన్సులతో గుర్తింపు రావడం ఆనందంగా ఉంది. నా గుర్తింపునకు కృషి చేసిన నా గురువు రమేష్కు జీవితాంతం రుణపడి ఉంటాను. మాస్టర్ లేకపోతే నాకు గుర్తింపు వచ్చేది కాదు.. ఆయనకు నా కృతజ్ఞతలు. ఈ అవకాశం ఇచ్చిన 'ఈటీవీ శ్రీదేవి డ్రామా కంపెనీ' కార్యక్రమానికి, 'మల్లెమాల' వారికి నా కృతజ్ఞతలు". -కండక్టర్ ఝాన్సీ
Conductor Jhansi Dance Talent: ‘‘నేను అట్టాంటి.. ఇట్టాంటి ఆడదాన్ని కాదు బాబోయ్‌... పల్సర్ బైక్ మీద రాను బాబోయ్‌..’’ అనే పాటకు విశాఖలోని గాజువాక ఆర్టీసీ డిపో కండక్టర్గా పని చేస్తున్న ఎ.ఝాన్సీ ఈటీవీలో ప్రసారమయ్యే ‘శ్రీదేవీ డ్రామా కంపెనీ’ షోలో ప్రదర్శించిన ఫోక్‌ డ్యాన్స్ ఇప్పుడు కుర్రకారుని హుషారెత్తిస్తోంది. ఈ ప్రదర్శనకు మెచ్చి న్యాయనిర్ణేతలు వేదికపైకి వెళ్లి.. ఆమెతో కలిసి స్టెప్పులేసి అభినందిస్తున్నారు. గాజువాక బీసీరోడ్డుకు చెందిన ఝాన్సీ భర్త నూకరాజు. ఆ దంపతులకు ఇద్దరు సంతానం. అటు ఉద్యోగం, చేస్తూనే ఇటు ఆసక్తి ఉన్న కళలో ప్రశంసలందుకుంటున్నారు.
‘నేను 8వ తరగతిలో ఉండగానే డ్యాన్స్ నేర్చుకున్నా. మా ఇంట్లో నృత్య శిక్షణ వద్దని వారించినా ఎంతో కష్టపడి ఇష్టంగా సాధన చేశా. పదో తరగతి పాసయ్యాక.. 2011లో ఆర్టీసీలో కండక్టర్గా ఎంపికయ్యా. ఏడాది శిక్షణ తర్వాత గాజువాక డిపోలో విధుల్లో చేరా. డ్యాన్స్ మాస్టర్లు శివ, విశాఖ థ్రిల్లర్‌ వెంకట్, శేఖర్, సురేష్‌ వద్ద శిక్షణ తీసుకున్నా. రమేష్ మాస్టర్ అన్ని విధాలా ప్రోత్సహించి ఆయన బృందంలో చేర్చుకుని వివిధ వేదికలపై ప్రదర్శనకు అవకాశం కల్పించారు’. -ఝాన్సీ
‘ఇప్పటికి రెండు తెలుగు రాష్ట్రాల్లో దాదాపు 1500 వరకూ వేదికలపై ప్రదర్శనలు ఇచ్చా. అక్కడి ప్రతిభతోనే టీవీ షోల్లో అవకాశం దక్కింది. ఓ టీవీలో వచ్చిన డ్యాన్సింగ్‌ స్టార్‌ పోటీల్లో ప్రథమ బహుమతి గెలుచుకున్నా. మెగాస్టార్‌ చిరంజీవి చేతుల మీదుగా రూ.5 లక్షల నగదు ప్రోత్సాహం అందుకున్నా. మరో ఛానల్‌లో రంగం-2, ఇంకో టీవీలో ప్రసారమైన తీన్మార్‌లో ఉత్తమ డ్యాన్సర్‌ అవార్డులు పొందా. ఆర్టీసీ సంస్థ ఆధ్వర్యంలో ఎక్కడ కార్యక్రమాలు నిర్వహించినా... డ్యాన్సర్‌గా, వ్యాఖ్యాతగా వ్యవహరిస్తుంటా. -ఝాన్సీ
‘ఈటీవీలో ప్రసారమవుతున్న ‘శ్రీదేవి డ్రామా కంపెనీ షో’లో డ్యాన్స్ చేసిన ప్రోమో ఇప్పుడు వైరల్‌గా మారింది. చాలా మంది ఫోన్లు చేసి ప్రశంసలు తెలియజేస్తుంటే ఎంతో ఆనందంగా ఉంది. డ్యాన్స్ గురువు రమేష్, ఆర్టీసీ ఉన్నతాధికారులు, యూనియన్‌ నాయకుడు శంకరరావు అన్ని విధాలా ప్రోత్సహిస్తున్నారు. భవిష్యత్తులో సినిమాల్లో నటించి మంచి గుర్తింపు తెచ్చుకోవడమే లక్ష్యం.
ఇవీ చదవండి:
