శ్రీలంక క్రికెట్ బోర్డుకు కాసుల పంట పండింది. 2022 సంవత్సరానికి గాను ఆ దేశ క్రికెట్ బోర్డు.. రికార్డు స్థాయిలో నికర లాభాన్ని ఆర్జించింది. రూ.630 కోట్ల భారీ లాభాన్ని అందుకుంది. ఆ దేశ క్రీడా సంఘం చరిత్రలో ఇదే అత్యధిక వార్షిక నికర లాభంగా గణాంకాలు తెలియజేస్తున్నాయి. "2022లో రూ.630 కోట్ల లాభం సమాకూరింది. అంతర్జాతీయ క్రికెట్, దేశవాళీ క్రికెట్, స్పాన్సర్ షిప్ కాంట్రాక్టులు, ఐసీసీ వార్షిక సభ్యుల చెల్లింపుల ద్వారా ఆ భారీ లాభాన్ని అందుకున్నాం" అని శ్రీలంక క్రికెట్ బోర్డు ఓ ప్రకటనలో తెలిపింది.
సంక్షోభంలోనూ మ్యాచ్లు.. తీవ్ర ఆర్థిక, రాజకీయ సంక్షోభంలో కొట్టుమిట్టాడుతున్న సమయంలోనూ శ్రీలంక క్రికెట్ బోర్డు తమ దేశంలో క్రికెట్ మ్యాచులు నిర్వహించింది. స్వదేశంలోనే ఆస్ట్రేలియాతో టీ20, వన్డే, టెస్ట్ మ్యాచులు ఆడింది లంక. ఆయా మ్యాచులకు క్రికెట్ అభిమానులు విపరీతంగా తరలివచ్చారు. తమ దేశానికి వచ్చి ఆడుతున్నందుకు ఆసీస్ క్రికెటర్లకు ధన్యవాదాలు తెలిపారు. బ్యానర్ల రూపంలో ఆనందం వ్యక్తం చేశారు. ఆ సమయంలో శ్రీలంక క్రికెట్ బోర్డుకు భారీగా ఆదాయం సమకూరింది.
కొత్త రాజ్యాంగం ఏర్పాటు!.. ఈ క్రమంలోనే శ్రీలంక క్రికెట్ కోసం కొత్త రాజ్యాంగాన్ని రూపొందించనున్నామని ఆ దేశ క్రీడా శాఖ మంత్రి రోషన్ రణ్సింగ్ తెలిపారు. అందుకు పది మంది సభ్యుల కమిటీని నియమించినట్లు ఆయన ప్రకటించారు. ఆ కమిటీకి రిటైర్డ్ సుప్రీంకోర్టు న్యాయమూర్తి కేటీ చిత్రసిరి నేతృత్వం వహిసిస్తున్నట్లు పేర్కొన్నారు. పలువురు ప్రముఖులతో పాటు మాజీ క్రికెటర్లు కూడా ఆ కమిటీలో ఉన్నట్లు వెల్లడించారు. కొత్త రాజ్యాంగ రూపకల్పన కోసం పలువురి నిపుణుల సలహాలు కోరినట్లు రణ్సింగ్ తెలిపారు. మరో రెండు నెలల్లో కొత్త రాజ్యాంగం సిద్ధం కానుందని చెప్పారు.
కాగా, శ్రీలంక.. త్వరలో న్యూజిలాండ్తో తలపడనుంది. రెండు టెస్ట్లు, మూడు వన్డేలు, మూడు టీ20 మ్యచులు ఆడనుంది. ఇరు జట్ల మధ్య మార్చి 9న తొలి టెస్ట్ ప్రారంభం కానుంది. మార్చి 25,28,31 తేదీల్లో కివీస్, లంక మధ్య వన్డే మ్యాచులు జరగనున్నాయి. ఏప్రిల్ 2,5,8 తేదీల్లో టీ20 మ్యాచులు జరగనున్నాయి. ఈ మ్యాచ్లన్నీ న్యూజిలాండ్లోనే జరగనున్నాయి.
