Rohith Sharma Record: టీ20ల్లో అత్యధిక పరుగుల రికార్డు ఇద్దరు టాప్ బ్యాటర్ల మధ్య దోబూచులాడుతోంది. ఇటీవలే రోహిత్ శర్మ పేరిట ఉన్న రికార్డును బద్దలుకొట్టి నెంబర్ వన్ స్థానానికి చేరుకున్నాడు కివీస్ బ్యాటర్ మార్టిన్ గప్తిల్. అయితే రెండు రోజులు కూడా ఆ ఆనందాన్ని ఆస్వాదించకముందే హిట్మ్యాన్ మళ్లీ దానిని లాగేసుకున్నాడు.
పొట్టి ఫార్మాట్లో అత్యధిక పరుగుల రికార్డు గతంలో రోహిత్ పేరిటే ఉండేది. కానీ రెండు రోజుల క్రితం స్కాట్లాండ్తో జరిగిన తొలి టీ20లో గప్తిల్ ఈ రికార్డును తన పేరిట రాసుకున్నాడు. గప్తిల్.. ఇండియా-వెస్టిండీస్ మ్యాచ్కు ముందు 3,399 పరుగులతో అగ్రస్థానంలో ఉన్నాడు. కానీ ఈ మ్యాచ్లో రోహిత్.. 44 బంతుల్లో 64 పరుగులు చేసి మళ్లీ అగ్రస్థానానికి చేరుకున్నాడు. 21 పరుగులు చేశాక రోహిత్.. గప్తిల్ను అధిగమించాడు.
ప్రస్తుతం ఈ జాబితాలో రోహిత్ శర్మ 129 మ్యాచులు ఆడి 3,443 పరుగులతో అగ్రస్థానంలో ఉండగా.. 116 మ్యాచుల్లో 3,399 పరుగులు సాధించి గప్తిల్ రెండో స్థానంలో ఉన్నాడు. అయితే గప్తిల్-రోహిత్ల అగ్రస్థానం కొట్లాట మరికొన్ని రోజులు తప్పేటట్టు లేదు. ఎందుకంటే ఇరు జట్లు వీలైనన్ని ఎక్కువ టీ20లు ఆడనున్న నేపథ్యంలో ఈ ఇద్దరి మధ్య ఆధిపత్యం చేతులు మారనుందని క్రీడా నిపుణులు అంటున్నారు.
హిట్ మ్యాన్.. 23 ఇన్నింగ్స్ల తర్వాత ఈ మ్యాచ్లో అర్ధ సెంచరీ సాధించాడు. చివరిసారిగా అతడు.. టీ20 ప్రపంచకప్ ముగిశాక న్యూజిలాండ్తో జరిగిన మ్యాచ్లో హాఫ్ సెంచరీ బాదాడు. ఈ ఏడాది టీ20ల్లో (అంతర్జాతీయ, ఐపీఎల్) అతడికి ఇదే తొలి హాఫ్ సెంచరీ కావడం విశేషం.
1000 పరుగులు చేసిన తొలి బ్యాటర్గా..
టీమ్ఇండియా వికెట్‌ కీపర్‌ రిషభ్ పంత్ మరో అరుదైన ఫీట్‌ నమోదు చేశాడు. వెస్టిండీస్‌తో జరిగిన తొలి టీ20లో 14 పరుగులు చేయడం ద్వారా ఈ ఏడాది అంతర్జాతీయ క్రికెట్లో(అన్ని ఫార్మాట్లలో) భారత జట్టు తరఫున వెయ్యి పరుగులు సాధించిన తొలి బ్యాటర్గా నిలిచాడు. ఈ మ్యాచ్కు ముందు పంత్.. 988 పరుగులతో ఉన్నాడు. విండీస్తో తొలి టీ20లో నాలుగో స్థానంలో బ్యాటింగ్కు వచ్చిన అతడు.. 12 బంతుల్లో 14 పరుగులు చేసి పెవిలియన్ చేరాడు.
ఇవీ చదవండి: రికార్డుల వేటలో టీమ్ఇండియా ఆటగాళ్లు.. జట్టులోకి సంజూ శాంసన్‌
IND vs WI: విజృంభించిన భారత బౌలర్లు.. తొలి టీ20లో విండీస్ చిత్తు
