క్రికెట్కు సంబంధించి ఎలాంటి సదుపాయలు లేని తమిళనాడులోని సేలం జిల్లాకు చెందిన చిన్నప్పంపట్టి అనే కుగ్రామంలో జన్మించాడు తంగరాసు నటరాజన్. ఆ రాష్ట్రంలో ప్రాచుర్యం పొందిన తమిళనాడు ప్రీమియర్ లీగ్లో చోటు దక్కించుకున్నాడు. వచ్చిన అవకాశాన్ని సద్వినియోగం చేసుకుని బౌలింగ్తో అదరగొట్టాడు. ఈ లీగ్లో యార్కర్ల స్పెషలిస్టుగా గుర్తింపు తెచ్చుకున్న నటరాజన్.. ఐపీఎల్లో అడుగుపెట్టి, అద్భుత ప్రదర్శన చేస్తున్నాడు. అరంగేట్ర సీజన్(2017)లో తడబడినా.. దాదాపు రెండేళ్ల తర్వాత ఇప్పుడు తన బౌలింగ్తో దిగ్గజ క్రికెటర్ల మెప్పు పొందుతున్నాడు. ఈ సందర్భంగా 'యార్కర్ మెషిన్' నటరాజన్ జీవిత విశేషాలు.
ఐపీఎల్ అరంగేట్రం
తమిళనాడు ప్రీమియర్ లీగ్లో అడుగుపెట్టి అభివన్ ముకుంద్, వాషింగ్టన్ సుందర్ లాంటి బ్యాట్స్మెన్ను యార్కర్లతో కట్టడి చేసి, విజయం సాధించాడు. ఈ టోర్నీతో అందరి దృష్టిని ఆకర్షించాడు. దీంతో 2017 ఐపీఎల్కుగానూ వేలంలో రూ.3 కోట్లకు పంజాబ్ జట్టు నటరాజన్ను సొంతం చేసుకుంది. ఆ ఏడాది ఆరు మ్యాచ్లాడిన సరే 9 పైగా ఎకానమీతో పరుగులిచ్చి, అనుకున్నంతలా మెప్పించలేకపోయాడు.
సీనియర్ల మెప్పు
ఐపీఎల్ 2018 సీజన్లో ముత్తయ్య మురళీథరన్ ప్రోద్బలంతో సన్రైజర్స్ హైదరాబాద్లో చోటు దక్కించుకున్నాడు. కేవలం రూ.40 లక్షలకే ఇతడిని సొంతం చేసుకుంది. అప్పటికే భువనేశ్వర్, రషీద్ ఖాన్ లాంటి స్టార్ బౌలర్లు ఉండటం వల్ల చివరి రెండు సీజన్లలో నటరాజన్కు ఆడే అవకాశం లభించలేదు. ఈసారి అవకాశం లభించిన తొలి మ్యాచ్లోనే స్టార్ బ్యాట్స్మన్ కోహ్లీ వికెట్ తీసి అందరి దృష్టిని ఆకర్షించాడు. దిల్లీ క్యాపిటల్స్పై డెత్ ఓవర్లలో అద్భుత యార్కర్లు వేసి మ్యాచ్ను గెలిపించాడు. వీరేంద్ర సెహ్వగ్, రికీ పాంటింగ్, వీవీఎస్ లక్ష్మణ్, బ్రెట్లీ లాంటి దిగ్గజాల పొగడ్తలు అందుకున్నాడు.
విలాసాల కంటే చదువే ముఖ్యం
తన సంపాదనంతా, తన సోదరీమణుల చదువు కోసమే ఉపయోగిస్తానని గతంలోని ఓ ఇంటర్వ్యూలో నటరాజన్ చెప్పాడు. విలాసాల కంటే చెల్లెళ్ల చదువే ముఖ్యమని అన్నాడు.
"ముందుగా నేను కనీస అవసరాలను తీర్చుకోవాలి. ఆ తర్వాతే విలాసాల గురించి ఆలోచిస్తాను. నా చెల్లెళ్లను బాగా చదివించాలి. వారి కాళ్లపై వారు నిలబడే వరకు నా సహకారాన్ని అందించాలి. ఖరీదైన కారులో తిరగడం కన్నా.. నా సోదరిమణలు చదువే నాకు ముఖ్యం" అని తెలిపాడు నటరాజన్.
