Rajamouli RRR movie collections: తెలుగు చిత్రసీమలో అపజయం ఎరుగని దర్శకుడు రాజమౌళి. తెలుగు సినిమా ఖ్యాతిని ప్రపంచం నలుమూలలా చాటిన దర్శకధీరుడు ఆయన. తన తొలి సినిమా 'స్టూడెంట్ నెం.1' నుంచి 'బాహుబలి 2' వరకు అన్నీ బాక్సాఫీస్ వద్ద ఘన విజయాన్ని అందుకున్నవే. అందులో కొన్ని సూపర్హిట్, మరికొన్ని బ్లాక్బాస్టర్స్, ఇంకొన్ని ఇండస్ట్రీహిట్స్. 'బాహుబలి'తో ప్రపంచం మొత్తం మన చిత్ర పరిశ్రమ గురించే మాట్లాడుకునేలా చేసిన ఘనత జక్కన్నది. ప్రేక్షకులను ఎలాంటి చిత్రాన్ని అందించాలి? ఏ సినిమాకు ఎంత బడ్జెట్ పెట్టాలి? వసూళ్ల ఏ మాత్రం అందుకుంటాయి? అని అంచనా వేయడంలోనూ ఆయన దిట్ట అనే చెప్పుకోవాలి. తాజాగా ఎన్టీఆర్, రామ్చరణ్తో ఆయన తెరకెక్కించిన భారీ బడ్జెట్ మూవీ 'ఆర్ఆర్ఆర్'. దాదాపు రూ.500కోట్ల బడ్జెట్తో రూపొందించారు. ఇప్పుడు అందరీ కళ్లు ఈ సినిమాపైనే. ఈ సినిమా ఎంత వసూళ్లు సాధిస్తుంది? బాక్సాఫీస్ వద్ద రికార్డులు సృష్టిస్తుందా? 'బాహుబలి' కలెక్షన్లను అధిగమిస్తుందా? వంటి విషయాలు సినీప్రియుల్లో ఆసక్తిని రేకెత్తిస్తున్నాయి. ఈ నేపథ్యంలో ఇప్పటివరకు ఆయన తెరకెక్కించిన సినిమాలు ఏంటి? అవి ఎంత బడ్జెట్తో రూపొందాయి? ఎంత కలెక్షన్లను అందుకున్నాయో తెలుసుకుందాం?
ఎన్టీఆర్ హీరోగా తెరకెక్కిన 'స్డూడెంట్ నెం.1' సినిమా ద్వారా రాజమౌళి దర్శకుడిగా పరిచయమయ్యారు. 2001లో వచ్చిన ఈ మూవీ నిర్మాణ వ్యయం రూ.1.80కోట్లు. ఇది బాక్సాఫీస్ వద్ద రూ.12కోట్ల గ్రాస్ను అందుకుంది. జక్కన్న తన రెండో సినిమాను కూడా తారక్తోనే చేశారు. మాస్ ఎంటర్టైనర్గా రూపొందిన 'సింహాద్రి' చిత్రం 2003లో విడుదలై సూపర్హిట్గా నిలిచింది. రూ.8కోట్లతో రూపొందిన ఈ మూవీ రూ.25-40 కోట్ల గ్రాస్ను కలెక్ట్ చేసింది.
2004లో నితిన్ హీరోగా వచ్చిన 'సై' రూ.8కోట్లతో తెరకెక్కగా రూ.13కోట్లను సాధించింది. 2005లో విడుదలైన ప్రభాస్ 'ఛత్రపతి' రూ.8కోట్ల బడ్జెట్తో ప్రేక్షకుల ముందుకు రాగా రూ.24కోట్లను వసూలు చేసి డార్లింగ్ కెరీర్లో బిగ్గెస్ట్ హిట్గా నిలిచింది. 2006లో రవితేజ 'విక్రమార్కుడు' రూ.11కోట్లతో రూపొందగా రూ.25కోట్లు వసూలు చేసింది. 2007లో మళ్లీ ఎన్టీఆర్తో నిర్మించిన 'యమదొంగ' రూ.6కోట్లతో తెరకెక్కగా రూ.28కోట్లను సాధించింది. ఇక 2009లో 'మగధీర' ఇండస్ట్రీ హిట్గా నిలిచింది. చరణ్ను స్టార్హీరోగా నిలబెట్టింది. ఈ మూవీకి అప్పట్లో రికార్డు స్థాయిలో రూ.35కోట్లు ఖర్చు చేయగా రూ.73కోట్లు సాధించి బాక్సాఫీస్ వద్ద రికార్డులు సృష్టించింది.
ఆ తర్వాత 'మర్యాదరామన్న'కు రూ.12కోట్లు పెట్టగా రూ.30కోట్లు సాధించింది. 2012లో ప్రయోగాత్మకంగా వచ్చిన 'ఈగ' మూవీ రూ.26కోట్లతో రూపొంది రూ.55కోట్లను అందుకుంది. 2015లో వచ్చిన 'బాహుబలి 1' దేశవ్యాప్తంగా ఎంతటి సంచలనం సృష్టించిందో ప్రత్యేకంగా చెప్పనక్కర్లేదు. రూ.180కోట్లు బడ్జెట్తో రూపొందిన ఈ మూవీ రూ.ఏకంగా 600కోట్లను సాధించి రికార్డు సృష్టించింది. 2017లో 'బాహుబలి 2'ను రూ.250కోట్లతో తెరకెక్కించగా రూ.1706 కోట్లను సాధించి చరిత్రకెక్కింది. ఇది మన జక్కన్న ట్రాక్ రికార్డు. అయితే ఈ సారి ఏకంగా కుంబస్థలాన్నే బద్దలకొట్టడానికి 'ఆర్ఆర్ఆర్'తో రానున్నారు రాజమౌళి. ఈ మూవీ రూ.3వేల కోట్లు సాధిస్తుందని సినీ విశ్లేషకులు భావిస్తున్నారు. మరి ఈ చిత్రం ఎంత వసూళ్లు సాధిస్తుందో చూడాలి.
ఇదీ చూడండి: ఆ ఫార్మాట్‌లో తొలి భారతీయ చిత్రంగా 'ఆర్ఆర్ఆర్'.. ఈ విశేషాలు తెలుసా?
