పాకిస్థాన్లో దారుణ ఘటన వెలుగు చూసింది. భార్య ముఖంపై దిండు పెట్టి ఊపిరాడకుండా చేసి చంపేశాడు ఓ భర్త. అంతటితో ఆగకుండా.. ఆమె మృతదేహాన్ని వేడి నీటి కడాయిలో పడేసి ఉడకబెట్టాడు. తన ఆరుగురు పిల్లల ముందే ఈ దారుణానికి ఒడిగట్టాడు. సమాచారం అందుకున్న పోలీసులు.. ఘటనాస్థలికి చేరుకుని బాధితురాలి మృతదేహం చూసి చలించిపోయారు. కేసు నమోదు చేసి నిందితుడి కోసం గాలిస్తున్నారు.
ఇదీ జరిగింది.. సింధ్ ప్రావిన్స్లో ఆషిక్ అనే వ్యక్తి తన కుటుంబంతో నివసిస్తున్నాడు. గుల్షన్-ఎ-ఇక్బాల్ ప్రాంతంలోని ఓ ప్రైవేటు పాఠశాలలో వాచ్మెన్గా పనిచేస్తున్నాడు. అదే పాఠశాలలోని ఓ గదిలో కుటుంబంతో ఉంటున్నాడు.
భార్యను చంపి.. ఆషిక్ ముగ్గురు పిల్లలతో పారిపోయాడు. అదే సమయంలో బాధితురాలి పెద్ద కుమార్తె పోలీసులకు సమాచారం అందించింది. వెంటనే ఘటనాస్థలికి చేరుకున్న పోలీసులు.. బాధితురాలి మృతదేహం చూసి చలించిపోయారు. పోస్టుమార్టం నిమిత్తం ఆమె మృతదేహాన్ని స్థానిక ఆసుపత్రికి తరలించారు. మిగతా ముగ్గురు పిల్లలను పోలీసులు.. సంరక్షణా కేంద్రానికి తరలించారు. కేసు నమోదు చేసుకున్న పోలీసులు.. నిందితుడి కోసం వెతుకుతున్నారు. అయితే ఈ ఘటన వెనుక కారణాలు ఇంకా తెలియాల్సి ఉందని పోలీసులు తెలిపారు. ఆషిక్ తన భార్యను అక్రమ సంబంధాలు పెట్టుకోవాలని బలవంతం చేశాడని, అందుకు ఆమె నిరాకరించడంతోనే హత్య చేశాడని ఊహాగానాలు వెల్లువెత్తాయి.
ఇవీ చదవండి: సైన్యం ఎంట్రీతో శ్రీలంక లైన్ క్లియర్! లగ్జరీ కార్లు సేఫ్.. ప్రధాని కుర్చీకి కాపలా!!
