రష్యా ఆక్రమిత క్రిమియాలో విధులు నిర్వహిస్తున్న మాస్కో దళాలపై డ్రోన్ దాడి జరిగింది. అయితే ఈ దాడిని క్రెమ్లిన్ నౌకాదళం సమర్థంగా తిప్పికొట్టిందని అధికారులు శనివారం వెల్లడించారు. కెర్చ్‌ వంతెన పేలుడుతో రష్యా-ఉక్రెయిన్ మధ్య ఉద్రిక్తతలు తీవ్రమైన వేళ.. ఈ ఘటన చోటుచేసుకోవడం గమనార్హం.
క్రిమియాలోని సెవాస్టోపోల్‌ పోర్ట్‌ వద్ద విధుల్లో ఉన్న మాస్కో నల్లసముద్రం నౌకాదళం లక్ష్యంగా శనివారం తెల్లవారుజామున 4.30 గంటల ప్రాంతంలో ఈ ఘటన చోటుచేసుకున్నట్లు సెవాస్టోపోల్‌ గవర్నర్‌ మైఖెల్‌ రజ్వోజయెవ్‌ టెలిగ్రామ్‌లో వెల్లడించారు. కొన్ని గంటల పాటు మాస్కో ఎయిర్‌ డిఫెన్స్‌ వ్యవస్థలు ఈ దాడులను తిప్పికొట్టాయని పేర్కొన్నారు. అన్ని మానవరహిత వాహనాలను రష్యా నేవీ కాల్చివేసినట్లు తెలిపారు. ఈ దాడుల్లో మౌలిక సదుపాయాలకు ఎలాంటి నష్టం జరగలేదని, అధికారులు అప్రమత్తంగా ఉన్నారని వెల్లడించారు.
అయితే ఈ దాడుల్లో రష్యాకు చెందిన పలు యుద్ధ నౌకలు దగ్ధమైనట్లు వార్తలు వస్తున్నాయి. తీర ప్రాంతంలో దట్టంగా పొగలు కమ్మేసిన ఫొటోలు సోషల్‌మీడియాలో వైరల్‌ అవుతున్నాయి. ఘటన నేపథ్యంలో హార్బర్‌ను తాత్కాలికంగా మూసివేశారు. కాగా.. ఈ దాడి ఉక్రెయిన్ సైన్యం జరిపి ఉంటుందని అధికారులు అనుమానం వ్యక్తం చేస్తున్నారు. కొద్ది రోజుల క్రితమే సెవాస్టోపోల్‌ సమీపంలోని ఓ థర్మల్‌ విద్యుత్ కేంద్రంపై డ్రోన్ దాడి జరిగింది.
ఇటీవల క్రిమియా-రష్యాను కలిపే కెర్చ్‌ వంతెనపై పేలుడు సంభవించి బ్రిడ్జి తీవ్రంగా ధ్వంసమైన విషయం తెలిసిందే. ఆ పేలుడుకు ఉక్రెయిన్ కారణమని ఆరోపించిన మాస్కో.. ఆ దేశంపై దాడులు మరింత పెంచింది. దీంతో రెండు దేశాల మధ్య ఉద్రిక్తతలు తీవ్రమయ్యాయి. ఈ క్రమంలో రష్యా ఆక్రమిత క్రిమియాలోని మాస్కో సేనలపై డ్రోన్ దాడులు జరగడం.. ఉద్రిక్తతలను మరింత పెంచే ఆస్కారముందని భయాందోళనలు వ్యక్తమవుతున్నాయి.
ఇదీ చదవండి: 'నేల విడిచి సాము'.. నింగికి చేరిన రష్యా- ఉక్రెయిన్ పోరు.. టార్గెట్ అవే!
