అఫ్గానిస్థాన్ నుంచి అమెరికా, నాటో దళాల ఉపసంహరణ చివరి దశకు చేరుకుంటున్న వేళ.. ఆ దేశంలో హింసాత్మక ఘటనలు పెరుగుతూనే ఉన్నాయి. కాందహార్ రాష్ట్రంలోని స్పిన్ బోల్దాక్ జిల్లాలో 100 మందికిపైగా పౌరులను ఓ సాయుధ మూక హత్య చేసినట్లు తెలుస్తోంది. ఇది కచ్చితంగా తాలిబన్ల చర్యేనని ఆ దేశ అంతర్గత మంత్రిత్వ శాఖ గురువారం తెలిపింది.
"పాకిస్థాన్లో ఉన్న తమ నాయకుల ఆదేశాలతో స్పిన్ బోల్దాక్లో అఫ్గాన్ తాలిబన్లు.. అరాచకాలకు పాల్పడుతున్నారు. ఎన్నో ఇళ్లను వారు దోచుకున్నారు. 100 మందికి పైగా పౌరులను బలిగొన్నారు. ఈ చర్యతో వారి అసలు క్రూర స్వరూపం ఏంటో బయటపడింది."
- అఫ్గాన్ అంతర్గత మంత్రిత్వ శాఖ
గతవారం స్పిన్ బోల్దాక్ ప్రాంతాన్ని తాలిబన్లు ఆక్రమించుకున్నారు. అక్కడి ఇళ్లను వారు దోచుకోవడమే కాకుండా.. ప్రభుత్వ వాహనాలను స్వాధీనం చేసుకున్నట్లుగా ఓ వీడియోను ఫ్రాన్స్ 24 సంస్థ విడుదల చేసింది. పాకిస్థాన్లోని బలూచిస్థాన్తో సంబంధాలు నెరిపేందుకు వీలుగా ఉండే ఈ ప్రాంతంలో.. తాలిబన్లు తమ బైకులపై తిరుగుతూ ఇళ్లను దోచుకుంటున్న దృశ్యాలు ఆ వీడియోలో కనిపించాయి. కొన్ని ఇళ్లపై తాలిబన్లు తమ జెండాను కూడా ఎగురవేసినట్లుగా కనిపించింది.
నేలపై మృతదేహాలు..
బక్రీద్ పండగకు ఒక్కరోజు ముందు తను కుమారులిద్దరినీ ఇంటి నుంచి కొంత మంది గుర్తు తెలియని సాయుధులు అపహరించుకుని వెళ్లారని స్పిన్ బోల్దాక్ ప్రాంతానికి చెందిన ఫిదా మహమ్మద్ అఫ్గాన్ అనే వ్యక్తి ఆవేదన వ్యక్తం చేశారు. అయితే.. వారు తాము తాలిబన్లము కాదని చెప్పారని తెలిపారు. అయితే.. వారు ఎవరైనా తమ కుమారులను విడిచిపెట్టి న్యాయం చేయాలని కోరారు.
స్పిన్ బోల్దాక్లో నేలపై పడి ఉన్న మృతదేహాలు కనిపిస్తున్నాయని అఫ్గాన్ భద్రతా వర్గాలు తెలిపాయి. మరోవైపు... తాము పౌరులు ఎవరినీ చంపలేదని తాలిబన్లు చెబుతూ ఉండటం గమనార్హం.
ఇవీ చూడండి:
