దర్శకధీరుడు రాజమౌళి తన సినిమాలతో గ్లోబల్ స్థాయిలో గుర్తింపు పొందారు. తన సినీ జర్నీలో ఎన్నో హిట్ సినిమాలకు ప్రాణం పోసిన ఈ స్టార్ డైరెక్టర్.. 'ఆర్ఆర్ఆర్' సినిమాతో ప్రపంచవ్యాప్తంగా మంచి పేరు సంపాదించారు. ఈ సినిమాకు ఆస్కార్ వరించడంతో ఆయన పేరు మరింత మారుమోగిపోయింది. దీంతో అభిమానులు సైతం ఆయన నెక్స్ట్ ప్రాజెక్ట్ ఎలా ఉండనుందో అంటూ భారీ అంచనాలు పెంచేసుకున్నారు. ఈ క్రమంలో ఆయన టాలీవుడ్ సూపర్ స్టార్ మహేశ్ బాబుతో నెక్స్ట్ ప్రాజెక్ట్ను అనౌన్స్ చేశారు. ఇండియానా జోన్స్ లాంటి అడ్వెంచర్ సినిమాల తరహాలో ఈ కథ ఉండనుందని కూడా వెల్లడించారు.
ఇప్పటికే ఈ సినిమా గురించి అనేక ఊహాగానాలు నెట్టింట చక్కర్లు కొడుతున్న వేళ ఇప్పుడు మరో వార్త సోషల్ మీడియాలో ట్రెండ్ అవుతోంది. ఈ సినిమాలో మహేశ్ బాబు క్యారెక్టర్ రామాయణంలోని హనుమంతుడి పాత్రను పోలి ఉంటుందన్న వార్తలు వినిపిస్తున్నాయి. అడవుల్లో జరిగే అక్రమాలపై మహేశ్ బాబు పోరాడనున్నారట. ఆఫ్రికన్ అడవుల నేపథ్యంతో సాగనున్న ఈ సినిమా.. 2023 చివరి కల్లా పట్టాలు ఎక్కనున్నట్లు సమాచారం. అంతే కాకుండా ఈ సినిమా షూటింగ్ అమెజాన్ అడవుల్లో మొదలు కానున్నట్లు సమాచారం. ఇక ఈ సినిమా కోసం జక్కన్న.. హాలీవుడ్ నుంచి భారీ వీఎఫ్ఎక్స్ టెక్నీషియన్స్ను రంగంలోకి దింపనున్నారట.
మరోవైపు ఈ సినిమా కోసం సోనీ పిక్చర్స్ , డిస్నీ సంస్థలు పోటీ పడుతున్నాయట. ఇక సోనీ పిక్చర్స్ అయితే ఏకంగా రాజమౌళితోనే చర్చలు జరిపినట్లు సమాచారం. అంతే కాకుండా ఈ సినిమాను మూడు భాగాల్లో తెరకెక్కించనున్నారన్న వార్తలు కూడా జోరందుకున్నాయి. ఒకవేళ ఇది నిజమైతే అన్ని సినిమాలు తీసేసరికి ఈజీగా పదేళ్లు పడుతుందని సినీ వర్గాల అంచనా. ఇక ఈ సినిమాలో పలువురు ఫేమస్ స్టార్స్తో పాటు హాలీవుడ్కు చెందిన స్టార్స్ కూడా నటించనున్నారనే టాక్ నడుస్తోంది.
ఇక మహేశ్ బాబు సినిమాల లైనప్ను చూస్తే.. ప్రస్తుతం ఆయన మాటల మాంత్రికుడు త్రివిక్రమ్తో ఓ సినిమాకు సైన్ చేశారు. SSMB 28 అనే వర్కింగ్ టైటిల్తో తెరకెక్కుతున్న ఈ సినిమా ప్రస్తుతం షూటింగ్ దశలో ఉంది. కాగా ఈ సినిమాలో మహేశ్ సరసన పూజా హెగ్డే నటిస్తున్నారు. మరోవైపు యంగ్ హీరోయిన్ శ్రీలీల కూడా ఈ సినిమాలో ఓ కీలక పాత్ర పోషిస్తున్నారు. శరవేగంగా చిత్రీకరణ జరుపుకుంటున్న ఈ సినిమా వచ్చే ఏడాది సంక్రాంతికి థియేటర్లలో సందడి చేయనుంది.
