వివిధ క్రీడల్లో రాణిస్తున్న యంగ్ తరంగాల గురించి ప్రత్యేక కథనం..
క్రికెట్లో 'షెఫాలీ' షో
జెంటిల్మెన్ గేమ్గా పిలుచుకునే క్రికెట్లోకి మిథాలీ రాజ్, జులన్ గోస్వామిల వారసత్వాన్ని పుణికిపుచ్చుకుంటూ.. ఎందరో అమ్మాయిలు అడుగుపెట్టారు. వారిలో నయా సంచలనం షెఫాలీ వర్మ ఒకరు. 16 ఏళ్ల పిన్న వయస్సులోనే భారత జట్టుకు ప్రాతనిథ్యం వహించి సచిన్ రికార్డును బద్దలు కొట్టిన షెఫాలీ.. బ్యాటుతోనూ విజృంభిస్తోంది. లేడీ సెహ్వాగ్గా పేరు తెచ్చుకుని విశేషంగా రాణిస్తోంది. ఓపెనర్గా బరిలోకి దిగి బంతిని బలంగా బాదుతూ సిక్సర్లు కొట్టే ఈ అమ్మాయి.. జట్టుకు శుభారంభాలు అందిస్తోంది. ఇప్పటివరకూ కెరీర్లో 18 మ్యాచ్లు ఆడి 485 పరుగులు చేసింది. ప్రస్తుతం జరుగుతున్న మహిళల టీ20 ప్రపంచకప్లో భారత జట్టు ఫైనల్కు చేరిందంటే.. అందుకు ఆమె బ్యాటింగే ప్రధాన కారణం అనడంలో సందేహం లేదు.
టేబుల్ టెన్నిస్లో మానికా, నైనా
హైదరాబాద్లోని కాచిగూడ డివిజన్ కుత్బిగూడలో ఉంటున్న నైనా జైస్వాల్ అంతర్జాతీయ టేబుల్ టెన్నిస్ క్రీడాకారిణి. భారత్ నుంచి 'ఐటీటీఎఫ్ వరల్డ్ హోప్స్ టీం - 2011' ఎంపికైన మొదటి అమ్మాయి నైనా. అండర్ - 12 విభాగంలో ప్రపంచ ర్యాంకింగ్స్లో ఆరో స్థానంలో ఉంది. పలు జాతీయ, అంతర్జాతీయ ఛాంపియన్‌షిప్‌లలో టైటిళ్లు గెలుచుకుంది. క్రీడల్లోనే కాదు చదువులోనూ సంచలనాలు సృష్టిస్తోంది నైనా. ప్రస్తుతం ఉస్మానియా యూనివర్సిటీలో దూరవిద్య ద్వారా ఎంఏ పొలిటికల్‌ సైన్స్‌ అభ్యసిస్తోంది.
మానికా బత్ర
దిల్లీకి చెందిన మానికా బత్ర.. 2018లో జరిగిన కామన్వెల్త్ గేమ్స్‌లో టేబుల్ టెన్నిస్ ఆటలో రెండు స్వర్ణాలతో సహా నాలుగు పతకాలను కొల్లగొట్టింది. ఈ క్రీడలో అత్యంత విజయవంతమైన భారత అథ్లెట్‌గా పేరుగాంచింది. ఆసియా క్రీడల్లో మిశ్రమ డబుల్స్లో శరత్ కమల్తో జతకట్టి కాంస్య పతకాన్ని గెలుచుకుని.. భారత్ తరఫున ఈ క్రీడల్లో అత్యుత్తమ విజయాన్ని నమోదు చేసింది. 23 ఏళ్ల బత్రా టేబుల్ టెన్నిస్లో తన హవా చూపిస్తోంది.
ట్రాక్పై 'హిమ' పరుగులు
స్ప్రింట్ సంచలనం హిమదాస్.. అంతర్జాతీయ ట్రాక్ ఈవెంట్‌లో బంగారు పతకం సాధించిన తొలి భారతీయ అథ్లెట్. ఫిన్లాండ్‌లో జరిగిన ఐఏఏఎఫ్ వరల్డ్ అండర్ - 20 అథ్లెటిక్స్ ఛాంపియన్‌షిప్‌లో మహిళల 400 మీటర్ల ఫైనల్ రేస్‌లో ఆమె అగ్రస్థానాన్ని కైవసం చేసుకుంది. హిమకు ముందు ఏ మహిళా ప్రపంచ ఛాంపియన్‌షిప్‌లో స్వర్ణం సాధించలేదు.
రింగ్లో 'వినేశ్' పట్టు
గీతా, బబితా ఫోగాట్ల తర్వాత మహిళా రెజ్లింగ్లో వినేశ్ ఫోగాట్ సత్తా చాటుతోంది. ఆసియా గేమ్స్ 2018లో వినేష్ ఫోగాట్ బంగారు పతకం సాధించింది. హర్యానాలోని తమ గ్రామంలో సమాజం నుంచి తీవ్ర ఒత్తిడి, వ్యతిరేకతను ఎదుర్కొని మరీ రింగ్లో మెరిసింది.
వీరితోపాటు మరెందరో అమ్మాయిలు క్రీడల వైపు వడివడిగా అడుగులు వేస్తున్నారు. భారత కీర్తి ప్రతిష్ఠలను అంతర్జాతీయ క్రీడా వేదికపై నిలిపేందుకు తమవంతు కృషి చేస్తున్నారు.
ఇవీ చదవండి:
