సోషల్ మీడియా సంస్థ ట్విటర్.. బ్లూటిక్కు సంబంధించి మరో కీలకమైన నిర్ణయం తీసుకుంది. ప్రపంచ వ్యాప్తంగా టాప్ 10వేల కంపెనీలకు ఉచితంగానే బ్లూటిక్ రైట్స్ను ఇవ్వనున్నట్లు ప్రకిటించింది. అలాగే ట్విట్టర్లో భారీగా ఫీజు చెల్లించి అత్యధికంగా యాడ్స్ ఇస్తున్న 500 టాప్ అడ్వర్టైజర్లకు కూడా ఈ నిర్ణయాన్ని వర్తింపచేయనున్నట్లు స్పష్టం చేసింది. ఆయా కంపెనీ ఖాతాల్లోని ఫాలోవర్స్ ఆధారంగానే టాప్ కంపెనీలతో పాటు ప్రముఖ యాడ్ కంపెనీలను గుర్తించి వాటికి మాత్రమే ఈ నిర్ణయాన్ని అమలు చేస్తామని సంస్థ వెల్లడించింది. ట్విట్టర్ వరుస నిర్ణయాలతో పలు కంపెనీల అడ్వర్టైజర్ల లాభాలు దెబ్బతిన్నాయన్న ఆరోపణల నేపథ్యంలో.. ఆయా సంస్థలను సంతృప్తి పరిచేందుకు కూడా ఈ నిర్ణయం తీసుకున్నట్లు తెలుస్తోంది.
ట్విట్టర్లో వెరిఫైడ్(అధికారిక) అకౌంట్గా పరిగణించే బ్లూటిక్ను పొందాలంటే ప్రస్తుతం 1000 డాలర్ల(భారత కరెన్సీలో రూ.82,000) రుసుము చెల్లించాల్సి ఉంది. ఈ బ్లూటిక్ ఉంటేనే ఆయా ఖాతాలను అధికారికమైన అకౌంట్లుగా భావిస్తారు. నెలవారీ లేదా వార్షిక రుసుమును చెల్లించిన తర్వాతే ఈ బ్లూటిక్ హక్కులను ఆయా సంస్థలకు ఇస్తుంది ట్విట్టర్.
కాగా, బ్లూటిక్ వెరిఫికేషన్ పాత విధానాన్ని ఈ ఏడాది ఏప్రిల్ నుంచే నిలిపివేయనున్నట్లు ఇదివరకే సంస్థ అధినేత ఎలాన్ మస్క్ ప్రకటించారు. దీని స్థానంలో నిర్ణీత ఫీజు చెల్లించిన వారికే మాత్రమే బ్లూటిక్ రైట్స్ను ఇస్తామని ట్విట్టర్ ప్రకటించిన నేపథ్యంలో సంస్థ తాజా నిర్ణయం తీసుకుంది. వెరిఫికేషన్ ఫర్ ఆర్గనైజేషన్స్గా పిలుస్తున్న ఈ కొత్త ప్రోగ్రామ్లో కంపెనీలు తమ వెరిఫైడ్ అకౌంట్ కోసం నెలకు వెయ్యి డాలర్లు చెల్లిస్తుండగా.. వాటి అనుబంధ కంపెనీల ఖాతాల కోసం అదనంగా 50 డాలర్లు(రూ.4,100)రుసుమును కట్టాలనే నిబంధన ఉంది.
వీరికి మాత్రమే ఓటు వేసే అవకాశం..
బ్లూటిక్ ఉన్న వారు మాత్రమే ట్విట్టర్ నిర్వహించే పోల్స్లో పాల్గొనడానికి అర్హులంటూ ఎలాన్ మస్క్ ఇటీవలే ప్రకటించారు. ఇది ఈ ఏడాది ఏప్రిల్ 1నుంచి అందుబాటులోకి వస్తుందని కూడా తెలిపారు. ఈ ప్రకటన వెలువడక ముందు ట్విట్టర్ పోల్స్లో ఇష్టారాజ్యంగా అందరూ పాల్గొని ఓటు వేసే అవకాశం ఉండేది. కానీ, మస్క్ తాజా ప్రకటనతో ఆ విధానానికి చెక్ పడ్డట్లయింది. దీంతో కేవలం బ్లూటిక్ ఉన్న వెరిఫైడ్ అకౌంట్స్ వారు మాత్రమే పోల్స్ ప్రక్రియలో ఓటు వేసే వీలును కల్పించింది ట్విట్టర్.
బ్లూటిక్తో లాభమేంటి..?
ట్విట్టర్లో అధికారిక ఖాతాను నిర్ధారించుకోవడానికి బ్లూటిక్లపైనే ఆధారపడతారు యూజర్లు. ఈ కారణంతోనే కంపెనీ(ట్విట్టర్) పట్ల కూడా వినియోగదారులు విశ్వసనీయతను కోల్పోవద్దనే ఉద్దేశంతోనే నిబంధనల్లో పలు మార్పులు చేర్పులు చేస్తూ వస్తోంది ట్విట్టర్. ఈ భారీ మార్పుల కారణంగా భారతదేశంలో ఇప్పటివరకు సుమారు 6.8 లక్షలకు పైగా ట్విటర్ ఖాతాలు నిషేధిత జాబితాలో చేరాయి.
బ్లూటిక్ మాత్రమే కాదు.. ఇంకా ఉన్నాయి!
ఏదైనా సంస్థ ఎటువంటి లాభాలు ఆర్జించకుండా పనిచేస్తే వాటికి ట్విట్టర్లో 'గోల్డ్ టిక్' మార్క్తో పాటు స్క్వేర్ అవతార్ గుర్తును ఇస్తుంది ట్విట్టర్. ప్రభుత్వ రంగ సంస్థలకు 'గ్రే టిక్' మార్క్తో పాటు గుండ్రంగా ఉండే అవతార్ గుర్తును మంజూరు చేస్తుంది సంస్థ. అయితే 'గోల్డ్ టిక్' కోసం సంస్థలు ప్రతి నెలా 1,000 డాలర్లు(భారత కరెన్సీ ప్రకారం రూ.82,300)లు చెల్లించాలి. అదే ఒక వ్యక్తిగత ఖాతాలకు 8 డాలర్లు(రూ. 657.45)లు రుసుమును చెల్లించాల్సి ఉంటుంది.
