Service charge in restaurant: హోటల్స్, రెస్టారెంట్స్లో బిల్లో ఆటోమెటిక్గా సర్వీస్ ఛార్జ్ వేయడాన్ని నిషేధిస్తూ.. సెంట్రల్ కన్జ్యూమర్ ప్రొటెక్షన్ అథారిటీ(సీసీపీఏ) జారీ చేసిన నిబంధనలపై దిల్లీ హైకోర్టు స్టే విధించింది. జాతీయ రెస్టారెంట్ల సంఘం, జాతీయ హోటళ్ల సంఘం ఈ నిబంధనలపై అభ్యంతరం తెలుపుతూ పిటిషన్ దాఖలు చేశాయి. దీనిపై విచారణ చేపట్టిన న్యాయస్థానం.. నవంబర్ 25 వరకు సీసీపీఏ తెచ్చిన నిబంధనలపై స్టే విధిస్తూ ఆదేశాలు జారీ చేసింది. ఛార్జీల విధింపు విషయాన్ని మెనూలో, బహిరంగంగా ప్రదర్శించాలని.. టేక్అవేపై ఎలాంటి ఛార్జీలు విధించరాదని సూచించింది. వినియోగదారుడు ఛార్జీలు కట్టడానికి ఇష్టపడకపోతే.. రెస్టారెంట్కు రావద్దని, అది అతడి ఎంపిక అని తెలిపింది.
అంతకుముందు జులై 4న హోటల్స్, రెస్టారెంట్స్లో సర్వీస్ ఛార్జ్ బాదుడు నుంచి ఉపశమనం కలిగించేలా కీలక ఆదేశాలు వెలువడ్డాయి. బిల్లో ఆటోమెటిక్గా సర్వీస్ ఛార్జ్ వేయడాన్ని నిషేధిస్తూ సెంట్రల్ కన్జ్యూమర్ ప్రొటెక్షన్ అథారిటీ(సీసీపీఏ) ఆదేశాలు జారీ చేసింది. నిబంధనలు ఉల్లంఘిస్తే ఫిర్యాదు చేసేందుకు ప్రత్యేక నంబర్ అందుబాటులోకి తెచ్చింది. సర్వీస్ ఛార్జ్ విషయంలో ఇటీవల ఫిర్యాదులు వెల్లువెత్తిన నేపథ్యంలో సీసీపీఏ ఈ మేరకు చర్యలు తీసుకుంది. హోటల్స్, రెస్టారెంట్లు బిల్స్ వేయడంపై స్పష్టమైన మార్గదర్శకాలు రూపొందించింది.
ఇవీ చదవండి: హోటల్స్, రెస్టారెంట్స్ సర్వీస్ ఛార్జ్ విధించడంపై బ్యాన్
