ఉత్తర్ప్రదేశ్లో రెండు వర్గాల మధ్య భీకర రాళ్లదాడి జరిగింది. చికెన్ కొనుగోలు విషయంలో ఇరువర్గాల మధ్య గొడవ చెలరేగగా.. ఒకరిపై ఒకరు రాళ్లదాడి చేసుకున్నారు. ఈ దాడిలో పలువురికి గాయాలయ్యాయి. గాయపడిన వారిని వెంటనే ఆస్పత్రికి తరలించారు. సమాచారం అందుకున్న పోలీసులు ఆ ప్రాంతంలో అదనపు బలగాలను మోహరించారు.
అసలేం జరిగిందంటే..?
సోమవారం రాత్రి అలీగఢ్లోని సరాయ్ సుల్తానీలో ఉన్న ఓ మాంసం దుకాణానికి ఇద్దరు యువకులు చికెన్ కోసం వెళ్లారు. ఆ సమయంలో దుకాణదారుడికి, ఆ యువకులకు మధ్య వాగ్వాదం జరిగింది. ఆ గొడవ కాస్త పెద్దదిగా మారి.. పరస్పరం ఒకరిపై ఒకరు రాళ్లు రువ్వుకున్నారు. ఆ తర్వాత ఈ గొవడ గురించి తెలిసిన ఇరు వర్గాలవారు అక్కడ చేరుకుని పెద్ద ఎత్తున రాళ్ల దాడికి పాల్పడ్డారు. దీనిపై సమాచారం అందుకున్న పోలీసులు, జిల్లా యంత్రాంగం.. భారీ సంఖ్యలో ఆ ప్రాంతానికి చేరుకున్నారు. వెంటనే ఇరువర్గాలను శాంతింపజేసి.. గొడవ సద్దిమణిగేలా చూశారు. ఈ దాడిలో గాయపడిన నలుగురిని ఆస్పత్రిలో చేర్పించారు. ప్రస్తుతం ఆ ప్రాంతంలో కర్ఫ్యూ విధించినట్లు జిల్లా మేజిస్ట్రేట్ విక్రమ్ సింగ్ తెలిపారు. దీనిపై అధికారికంగా ఎటువంటి ఫిర్యాదు అందలేదని.. అందిన వెంటనే చర్యలు తీసుకుంటామని డీఐజీ దీపక్ కుమార్ వెల్లడించారు.
డబ్బుకోసం యువతి కిడ్నాప్..
యూపీలోని మహారాజ్గంజ్ జిల్లాలో ఓ 'లా' విద్యార్థిని కిడ్నాప్ స్థానికంగా కలకలం రేపింది. సోమవారం సాయంత్రం పరీక్ష రాసి బయటకు వచ్చిన ఆ యువతిని కొందరు మహిళలు రెండు కార్లలో వచ్చి బలవంతంగా ఎత్తుకెళ్లారు. దీనిపై సమాచారం అందుకున్న పోలీసులు కేసు నమోదు చేసుకుని.. సీసీటీవీ ఆధారంగా నిందితులను గుర్తించే పనిలో పడ్డారు. సోమవారం రాత్రి సమయంలో నౌత్వానా ప్రాంతంలోని ఓ టోల్గేట్ వద్ద ఆమెను గుర్తించారు పోలీసులు. యువతి గతంలో ఓ ఎన్జీఓ నిర్వహించేదని.. ఆ డబ్బులు కొసమే ఆమెను అపహరించినట్లు పోలీసులు భావిస్తున్నారు.
