గుజరాత్ రాజ్కోట్లో విద్యార్థులతో ప్రయాణిస్తున్న స్కూల్ బస్సుకు.. ఓ బాలిక కారణంగా త్రుటిలో పెను ప్రమాదం తప్పింది. డ్రైవర్కు అకస్మాత్తుగా గుండెపోటు రావడం వల్ల బస్సు అదుపు తప్పి అనేక వాహనాలు ఢీ కొట్టింది. ఈ క్రమంలోనే సమయస్ఫూర్తిగా వ్యవహరించిన ఓ బాలిక.. బస్సును ప్రమాదం నుంచి తప్పించింది. దీంతో బస్సులోని విద్యార్థులు సురక్షితంగా బయట పడ్డారు. ఈ ఘటన శనివారం సాయంత్రం జరిగింది.
రాజ్కోట్లోని భారడ్ పాఠశాలకు చెందిన బస్సు విద్యార్థులతో వెళ్తోంది. గొండాల్ రోడ్డు వద్దకు చేరుకోగానే డ్రైవర్కు అకస్మాత్తుగా గుండెపోటు వచ్చింది. దీంతో బస్సు అదుపు తప్పి.. డివైడర్ దాటి ఎదురుగా వస్తున్న వాహనాలను ఢీ కొట్టింది. దీనిని గమనించిన భార్గవి వ్యాస్ అనే బాలిక స్టీరింగ్ను పట్టుకుని బస్సును నియంత్రించే ప్రయత్నం చేసింది. రోడ్డు పక్కనే ఉన్న కరెంట్ స్తంభాన్ని ఢీకొట్టి బస్సు ఆపింది. దీంతో పెను ప్రమాదం తప్పింది. గుండెపోటుకు గురైన డ్రైవర్ హరున్భాయి ప్రస్తుతం రాజ్కోట్ సివిల్ ఆస్పత్రిలో చికిత్స పొందుతున్నాడు.
"నేను అస్ట్రోన్ చౌక్ వద్ద బస్సు ఎక్కి డ్రైవర్ పక్కనే ఉన్న సీట్లో కూర్చున్నాను. భక్తినగర్ సర్కిల్ వద్ద కొందరు విద్యార్థులు బస్సు ఎక్కారు. ఆ తర్వాత బస్సు గొండాల్ రోడ్డు వద్దకు చేరుకోగానే.. డ్రైవర్ మాటలు తడబడ్డాయి. అతడి నోరు ఒకవైపునకు వచ్చేసి.. ముక్కు నుంచి రక్తం కారింది. స్టీరింగ్ వదిలేసి ఒక పక్కకు పడిపోయాడు. దీంతో బస్సు డివైడర్ దాటి ఎదురుగా ఉన్న వాహనాలను ఢీ కొట్టింది. దీనిని గమనించి నేను వెంటనే స్టీరింగ్ పట్టుకుని బస్సును కరెంట్ స్తంభానికి ఢీకొట్టి ఆపాను."
-- భార్గవి వ్యాస్, విద్యార్థిని
ఇవీ చదవండి : దొంగకు చుక్కలు చూపించిన మహిళ... కొరికేసిన చేతివేలితో పోలీస్ స్టేషన్కు..
దేశంలో తొలి 'వన్ హెల్త్ సెంటర్' ఏర్పాటు.. ఫారిన్ వర్సిటీతో భారత్ బయోటెక్ కీలక ఒప్పందం
