Hindu Idols in Taj Mahal: తాజ్ మహల్ నేలమాళిగలో(బేస్మెంట్) ఎలాంటి మూసిఉన్న గదులు కానీ, హిందూ దేవతల విగ్రహాలు కానీ లేవని స్పష్టం చేసింది భారత పురావస్తు శాఖ(ఏఎస్ఐ). సమాచార హక్కు చట్టం(ఆర్టీఐ) కింద అడిగిన ప్రశ్నకు ఇలా బదులిచ్చింది.
తాజ్మహల్ నేలమాళిగలో హిందూ దేవతా విగ్రహాలు ఉన్నాయని ఇటీవల ప్రచారం జరిగింది. చారిత్రక కట్టడంలోని మూసి ఉన్న 22 గదులను తెరవాలని.. అయోధ్య భాజపా మీడియా ఇంఛార్జ్ డా. రజనీశ్ కుమార్ 2022, మే 7న అలహాబాద్ హైకోర్టులో పిటిషన్ కూడా దాఖలు చేశారు. ఆ గదులు తెరిచేలా ఏఎస్ఐకి ఆదేశాలు ఇవ్వాలని ఆ వ్యాజ్యంలో కోరారు. అయితే.. మే 12న దీనిని తోసిపుచ్చింది ధర్మాసనం.
ఇది జరిగిన కొన్ని రోజులకు తృణమూల్ కాంగ్రెస్ ప్రతినిధి సాకేత్ గోఖలే.. జూన్ 21న ఆర్టీఐ కింద ఏఎస్ఐని కొన్ని ప్రశ్నలు అడిగారు. ''తాజ్ మహల్ ఉన్న భూమి.. ఏదైనా ఆలయానికి చెందినదా? తాజ్ మహల్ నేలమాళిగలోని మూసి ఉన్న గదుల్లో హిందూ దేవతల విగ్రహాలు ఉన్నాయా?'' అని ప్రశ్నించారు. దీనికి బదులుగా.. మూసిఉన్న గదుల్లేవని, ఆ ప్రదేశమూ ఏ ఆలయానికి చెందినది కాదని స్పష్టం చేసింది ఏఎస్ఐ.
ఇవీ చూడండి: 'తాజ్మహల్ స్మారకం కాదు శివాలయం.. 22గదుల్లో హిందూ దేవుళ్లు?'
