చిన్నపాటి ట్రీట్‌మెంట్‌కే లక్షల రూపాయలు ఖర్చవుతున్న ఈ రోజుల్లో.. ఛత్తీస్గఢ్లోని రాయ్పుర్కు చెందిన డాక్టర్ వినయ్ వర్మ.. గత నాలుగేళ్లుగా కేవలం ఒక్క రూపాయికే వైద్య సేవలు అందిస్తున్నారు. ఇలా వచ్చిన కొద్ది మొత్తాన్ని కూడా సామాజిక కార్యక్రమాలు చేపట్టేవారికి విరాళంగా ఇస్తున్నారు. కాగా, ఆయన రాయ్పుర్ అంబేడ్కర్ ప్రభుత్వాసుపత్రిలో చీఫ్ మెడికల్ ఆఫీసర్గా విధులు నిర్వర్తిస్తున్నారు. సొంత క్లినిక్లో రూపాయికే వైద్యం అందిస్తున్నారు. తాజాగా ఈటీవీ భారత్తో వినయ్ వర్మ ప్రత్యేకంగా మాట్లాడారు. తాను అందిస్తున్న వైద్య సేవల గురించి వివరించారు.
"ఒక్క రూపాయి క్లినిక్ ప్రారంభించి నాలుగేళ్లు అవుతోంది. ప్రతీరోజు ఉదయం 8 నుంచి 10 గంటల వరకు నా ఇంట్లోనే పేషెంట్లను చూస్తాను. ఆ తర్వాత 10 నుంచి 11 గంటల వరకు నా క్లినిక్లో వైద్య సేవలందిస్తాను. కేవలం రూపాయి మాత్రమే తీసుకుంటాను. ఆ మొత్తాన్ని కూడా సామాజిక కార్యక్రమాలు నిర్వహించేవారికి విరాళంగా ఇస్తాను."
- డాక్టర్ వినయ్ వర్మ
ప్రభుత్వాసుపత్రిలో పనిచేస్తున్న నేపథ్యంలోటి.. వర్కింగ్ డేస్లో రోగుల కోసం ప్రత్యేక సమయం కేటాయిస్తానని తెలిపారు వినయ్ వర్మ. సెలవు రోజుల్లో ఉదయం, మధ్యాహ్నం క్లినిక్లో వైద్య సేవలందిస్తామని చెప్పారు. "నా వద్దకు వచ్చే చాలా మంది రోగులు మందులు కూడా కొనుగోలు చేయలేని స్థితిలో ఉంటారు. అలాంటి సమయంలో వారికి మందులు ఉచితంగా అందిస్తాను. రోజూ 30 నుంచి 40 మంది రోగులకు వైద్య సేవలు అందిస్తాను" అని డాక్టర్ వినయ్ వర్మ చెప్పారు.
ఛత్తీస్గఢ్ ముఖ్యమంత్రి భూపేశ్ బఘేల్ తనకు ఆదర్శమని తెలిపారు డాక్టర్ వినయ్ వర్మ. రోగులను డాక్టర్లు దోచుకోవడం లేదని, ఆరోగ్యం పేరుతో వ్యాపారాలు సాగిస్తున్న వ్యక్తులే అసలైన దోషులని ఆయన అన్నారు.
