'గంగమ్మ'కు భారతీయ జనతా పార్టీ ద్రోహం చేసిందని ఆరోపించారు సమాజ్వాదీ పార్టీ అధినేత, ఉత్తర్ప్రదేశ్ మాజీ ముఖ్యమంత్రి అఖిలేశ్ యాదవ్. గంగా నది మునుపటిలాగే ఉందని, గంగమ్మను పట్టించుకోవడం లేదని విమర్శించారు.
2022 అసెంబ్లీ ఎన్నికల నేపథ్యంలో 'సమాజ్వాదీ విజయ్ యాత్ర'ను చేపట్టారు అఖిలేశ్ యాదవ్. కాన్పుర్లో ర్యాలీ నిర్వహించారు. ప్రభుత్వం, గంగమ్మతో పాటు ప్రజలను కూడా మోసం చేసిందని మండిపడ్డారు.
"గంగమ్మకు భాజపా ద్రోహం చేసింది. గంగా నదీ మునుపటిలాగే దుర్భరమైన స్థితిలో ఉంది. కాన్పుర్ ఓ పెద్ద నగరం. ఇక్కడ ఉద్యోగాలున్నాయి, వ్యాపారాలున్నాయి. అవన్నీ తమ కళ్ల ముందు నాశనమవ్వడాన్ని ప్రజలు చూశారు. రైతులను కేంద్రం, రాష్ట్రంలోని భాజపా సర్కారు మోసం చేసింది. ఉద్యోగాలు లాక్కుంది. ద్రవ్యోల్బణం విపరీతంగా పెరిగింది. ప్రజలకు భాజపా ప్రభుత్వం ద్రోహం చేసింది."
--- అఖిలేశ్ యాదవ్, ఉత్తర్ప్రదేశ్ మాజీ సీఎం.
రాష్ట్రంలో భాజపా తుడిచిపెట్టుకుపోతుందని, దాని కోసమే విజయ్ యాత్రకు శ్రీకారం చుట్టినట్టు అఖిలేశ్ వెల్లడించారు. భాజపాను గద్దె దింపి, ప్రజల ఆశీర్వాదాలు పొందేంతవరకు యాత్ర కొనసాగుతుందని స్పష్టం చేశారు.
భాజపా స్పందన...
గంగా నది మీద అఖిలేశ్ యాదవ్ చేసిన విమర్శలను భాజపా తిప్పికొట్టింది. అఖిలేశ్.. ప్రయాగ్రాజ్ వెళ్లాలని.. అక్కడ గంగ, యమున ఎంత శుభ్రంగా ఉన్నాయో చూడాలని సూచించింది.
ఇదీ చూడండి:- 'లఖింపుర్ హింస' ఎన్నికల్లో భాజపాను దెబ్బకొడుతుందా?
