కేరళలో రెండు వేర్వేరు రోడ్డు ప్రమాదాల్లో నలుగురు యువకులు మరణించారు. బైక్పై వెళ్తున్న ఇద్దరు యువకులు ఎదురుగా వస్తున్న ద్విచక్రవాహనాన్ని ఢీకొట్టారు. ఈ ప్రమాదంలో ఇద్దరు యువకులు అక్కడికక్కడే చనిపోయారు. ఎదురుగా వచ్చిన బైకర్ తీవ్రంగా గాయపడ్డాడు. ఈ ప్రమాదం కోజికోడ్- కోయిలాండి జాతీయ రహదారిపై ఆదివారం తెల్లవారుజామున జరిగింది. యువకులు హెల్మెట్ పెట్టకపోవడం వల్ల తీవ్ర గాయాలై మరణించారని పోలీసులు తెలిపారు. మృతులు ఆలయ ఉత్సవానికి వెళ్లి వస్తుండగా ఈ ప్రమాదం జరిగిందని పేర్కొన్నారు. ఈ ప్రమాద దృశ్యాలు సీసీటీవీలో రికార్డయ్యాయి.
చెట్టును ఢీకొట్టిన కారు..
కొల్లాంలోని కుందర సమీపంలో నలుగురు యువకులతో వెళ్తున్న ఓ కారు రోడ్డు పక్కన ఉన్న చెట్టును ఢీకొట్టింది. ఈ ప్రమాదంలో ఇద్దరు యువకులు మరణించగా.. మరో ఇద్దరు తీవ్రంగా గాయపడ్డారు. వారిలో ఒకరి పరిస్థితి విషమంగా ఉన్నట్లు పోలీసులు తెలిపారు. ఈ ఘటన ఆదివారం వేకువజామున జరిగినట్లు పేర్కొన్నారు. ఈ ప్రమాద దృశ్యాలు స్థానిక సీసీటీవీ కెమెరాల్లో నమోదయ్యాయి.
