మొదటిసారి భారత పర్యటనకు వస్తున్న అమెరికా అధ్యక్షుడు డొనాల్డ్ ట్రంప్ కోసం గుజరాతీ రుచులు సిద్ధమవుతున్నాయి. వీరి మెనూలో ఖమాన్, మల్టీగ్రెయిన్ రోటీలతో పాటు మరిన్ని రుచికరమైన వంటకాలు చేర్చనున్నారు. ట్రంప్ దంపతులను తమ వంటలతో మైమరిపించేందుకు... ఫార్చూన్ ల్యాండ్మార్క్ హోటల్ చీఫ్ చెఫ్ సురేశ్ ఖన్నా రంగంలోకి దిగారు.
గుజరాతీ స్థానిక వంటకాలైన బ్రోకలీ సమోసా, తేనె కుకీలు, మల్టీగ్రెయిన్ కుకీలు, కొబ్బరి నీళ్లు, ఐస్ టీ, స్పెషల్ ఛాయ్, స్నాక్స్లను అగ్రదేశ అతిథులకు రుచి చూపించబోతున్నట్లు సురేశ్ స్పష్టం చేశారు. ఈ మెనూకు భద్రతా తనిఖీలు కూడా జరిగినట్లు వెల్లడించారు.
"ఇది మాకు ప్రత్యేకమైన రోజు. అమెరికా అధ్యక్షుడి కోసం ప్రత్యేక ఏర్పాట్లు చేశారు. ఆయన పర్యటన కోసం నిజంగా ఎదురుచూస్తున్నాం. వారి కోసం గుజరాతీ వంటకాలు సిద్ధం చేస్తున్నాం." - చీఫ్ చెఫ్ సురేష్ ఖన్నా
స్వాగత సన్నాహాలు
ఫిబ్రవరి 24,25 తేదీల్లో అమెరికా అధ్యక్షుడు డొనాల్డ్ ట్రంప్ భారత్లో పర్యటించనున్నారు. ఆయన కోసం గుజరాత్ అహ్మదాబాద్లో భారీ ఎత్తున స్వాగత సన్నాహాలు చేస్తున్నారు.
'నమస్తే ట్రంప్' కార్యక్రమంలో పాల్గొనడానికి మోటేరా స్టేడియానికి వెళ్లే ముందు, ట్రంప్ సబర్మతి ఆశ్రమాన్ని దర్శించే అవకాశం ఉంది.
ఇదీ చూడండి: నమస్తే ట్రంప్: '2 దేశాల కోసం 2 పులుల స్నేహం'
