కొత్త వ్యవసాయ చట్టాన్ని సవాలు చేస్తూ సుప్రీంకోర్టులో పిటిషన్ దాఖలైంది. కేరళ కాంగ్రెస్ ఎంపీ టీఎన్ ప్రతాపన్ ఈ వ్యాజ్యం దాఖలు చేశారు. రైతుల(సాధికారత, రక్షణ) ధర హామీ, సేవల ఒప్పంద చట్టం-2020 రాజ్యాంగ విరుద్ధమని పిటిషన్లో పేర్కొన్నారు. ఈ చట్టం చెల్లదని, వెంటనే రద్దు చేయాలని సుప్రీంకోర్టును కోరారు.
రైతుల ట్రైబ్యూనల్ ఏర్పాటు చేసే ఆదేశాలు ఇవ్వాలని ప్రతాపన్ అభ్యర్థించారు. ఇందుకు సంబంధించి ఆదేశాలు జారీ చేయాలని కోరారు. సమాంతర మార్కెట్లకు అవకాశం ఇస్తే రైతులు దోపిడీకి గురవుతారని పేర్కొన్నారు.
పంజాబ్ సైతం
మరోవైపు, వ్యవసాయ చట్టాలపై సుప్రీంకోర్టుకు వెళ్తామని పంజాబ్ సీఎం అమరీందర్ సింగ్ పేర్కొన్నారు. నూతన చట్టాలకు వ్యతిరేకంగా జరిగిన నిరసనల్లో పాల్గొన్నారు. రైతుల ప్రయోజనాల కోసం తమ ప్రభుత్వం ఏ నిర్ణయమైనా తీసుకుంటుందన్నారు. 'బిల్లులకు రాష్ట్రపతి ఆమోదం లభించింది కాబట్టి ఇప్పుడు సుప్రీంకోర్టులో సమస్యపై పోరాడతా'మని స్పష్టం చేశారు.
