భారత్లో కరోనా వేగం పుంజుకుంటోంది. రాష్ట్రాలన్నీ లాక్డౌన్ చర్యలు చేపట్టినప్పటికీ.. రోజురోజుకూ కేసులు పెరుగుతున్నాయి. దేశవ్యాప్తంగా ఇప్పటివరకు 24,942 మందికి వైరస్ నిర్ధరణ అయ్యింది.
రాష్ట్రాల్లో ప్రభావం ఇలా...
- మధ్యప్రదేశ్ ఇండోర్లో మరో ఇద్దరు కరోనాతో మరణించారు. నగరంలో మెత్తం మృతుల సంఖ్య 57కు చేరింది. గత 24 గంటల్లో 56 మందికి వైరస్ సోకగా.. బాధితుల సంఖ్య 1,085కు పెరిగింది.
- రాజస్థాన్లో శనివారం 25 కేసులు నమోదయ్యాయి. రాష్ట్రవ్యాప్తంగా మొత్తం 2,059 మందికి పాజిటివ్ నిర్ధరణ అయ్యింది. 32 మంది వైరస్తో మరణించారు.
- కర్ణాటక బెంగళూరులో కొత్తగా 15 మందికి కరోనా సోకింది. ఇప్పటివరకు 500 కేసులు నమోదైనట్లు అధికారులు తెలిపారు.
- కోల్కతాలో శిశువుకు జన్మనిచ్చిన ఓ మహిళకు కొవిడ్ పాజిటివ్ తేలింది. వెంటనే ఆమెను మరో ఆసుపత్రికి తరలించారు. ప్రస్తుతం చిన్నారిని ఐసోలేషన్లో ఉంచి.. పరీక్షలు నిర్వహిస్తున్నారు. బంగాల్లో మొత్తం 18 మంది వైరస్కు బలయ్యారు. 485 మందికి ఈ మహమ్మారి సోకింది.
- జమ్మకశ్మీర్లో మరొకరు వైరస్కు బలయ్యారు. ఇప్పటివరకు మొత్తం ఆరుగురు వైరస్కు బలయ్యారు. మరో 40 మందికి కరోనా సోకగా.. మహమ్మారి బారిన పడ్డ వారి సంఖ్య 494కు చేరింది.
- బిహార్లో కొత్తగా ఐదుగురు మహమ్మారి బారిన పడ్డారు. రాష్ట్రంలో కేసుల సంఖ్య 228కి పెరిగింది.
- పంజాబ్లోని ఆరు జిల్లాల్లో వైరస్ బాధితులంతా కోలుకున్నట్లు అధికారులు తెలిపారు. ప్రస్తుతం ఇక్కడ ఎటువంటి కేసులు లేవని స్పష్టం చేశారు.
