మహారాష్ట్రలో కరోనా పాజిటివ్‌ కేసుల సంఖ్య రోజురోజుకూ పెరుగుతోంది. ఇప్పటివరకు రాష్ట్రంలో మొత్తం కేసుల సంఖ్య 6 వేలు దాటింది. వాటిలో కేవలం ముంబయిలోనే కేసుల సంఖ్య 4 వేలు దాటడం గమనార్హం. రాష్ట్రవ్యాప్తంగా గురువారం ఒక్కరోజే 778 పాజిటివ్‌ కేసులు నమోదయ్యాయి. దీంతో మొత్తం కేసుల సంఖ్య 6,427కి చేరింది. మరో 14 మంది మృతిచెందగా.. మొత్తం మరణాల సంఖ్య 28కి చేరింది.
మంత్రికి కరోనా..
మహారాష్ట్రలో ఓ మంత్రికి కరోనా వైరస్ సోకినట్లు ఆరోగ్య శాఖ అధికారి తెలిపారు. ప్రస్తుతం ఆయన ముంబయిలోని ఓ ఆసుపత్రిలో చికిత్స పొందుతున్నట్లు వెల్లడించారు.
ముంబయిలో గురువారం ఒక్కరోజే కొత్తగా 478 పాజిటివ్‌ కేసులు నమోదైనట్లు బృహన్ ముంబయి మున్సిపల్ కార్పొరేషన్(బీఎంసీ) వెల్లడించింది. దీంతో మొత్తం కేసుల సంఖ్య 4,232కి చేరింది. తాజాగా 8 మంది మరణించడంతో ఇప్పటివరకు మృతి చెందిన వారి సంఖ్య 168కి చేరిందని స్పష్టం చేసింది బీఎంసీ.
పుణెలో కొత్తగా 104 కరోనా కేసులు నమోదయ్యాయి. మరో 3 మరణాలతో.. నగరంలో మొత్తం 63 మంది ప్రాణాలు కోల్పోయారు. ఇక్కడ ముగ్గురు ఎస్ఆర్పీఎఫ్ జవాన్లకు కరోనా సోకగా.. వీరిని ఆస్పత్రిలో చేర్పించినట్లు అధికారులు తెలిపారు.
ఠాణెలో మరో 42 మందికి కరోనా బారినపడగా.. మొత్తం బాధితుల సంఖ్య 542కు చేరింది.
