Telangana Lok Sabha Election Polling Percentage : రాష్ట్రంలో అక్కడక్కడ చెదురుమదరు ఘటనలు మినహా లోక్సభ ఎన్నికల పోలింగ్ ప్రశాంతంగా ముగిసింది. ఇప్పటి వరకు కొలిక్కి వచ్చిన లెక్కల ప్రకారం లోక్సభ ఎన్నికల్లో పోలింగ్ 64.93 శాతం నమోదైంది. సోమవారం ఉదయం 7 గంటలకు ప్రారంభమైన పోలింగ్ 9 గంటల వరకు 9.51 శాతం మంది ఓట్లు వేశారు. ఆ తర్వాత పలు ప్రాంతాల్లో పుంజుకొని 11 గంటలకు పోలింగ్ శాతం 24.31 శాతానికి చేరుకుంది. మధ్యాహ్నం ఒంటిగంట వరకు 40.38 శాతం పోలింగ్ పెరిగింది. ఇలా క్రమంగా పెరుగుతూ మధ్యాహ్నం 3 గంటల వరకు 52.34 శాతానికి, సాయంత్రం 5 గంటలకు 61.16 శాతానికి పెరిగింది.
మావోయిస్టు ప్రాబల్యమున్న 5 పార్లమెంటు నియోజకవర్గాల పరిధిలోని 13 అసెంబ్లీ సెగ్మెంట్లలో సాయంత్రం 4 గంటలకే పోలింగ్ ముగిసింది. సిర్పూర్, ఆసిఫాబాద్, చెన్నూరు, బెల్లంపల్లి, మంచిర్యాల, మంథని, భూపాలపల్లి, ములుగు, పినపాక, ఇల్లందు, భద్రాచలం, కొత్తగూడెం, అశ్వరావుపేట అసెంబ్లీ నియోజకవర్గాల్లో సాయంత్రం 4 గంటలకు పోలింగ్ పూర్తయింది. మిగతా 106 అసెంబ్లీ నియోజకవర్గాల పరిధిలో సాయంత్రం 6 గంటలకు పోలింగ్ సమయం ముగిసినప్పటికీ సుమారు 1400 బూత్‌లలో అప్పటికే క్యూలో ఉన్న ఓటర్లు రాత్రి వరకు ఓట్లు వేశారు.
హైదరాబాద్లో పోలింగ్ అత్యల్పం : ఇప్పటి వరకు తేలిన లెక్కల ప్రకారం అత్యధికంగా భువనగిరిలో 76.47 శాతం నమోదు అవ్వగా, అతి తక్కువగా హైదరాబాద్లో 46.08 శాతం పోలింగ్ జరిగింది. గ్రేటర్ హైదరాబాద్ పరిధిలో ఈసారి కూడా పోలింగ్ తక్కువగానే జరిగింది. ఇప్పటివరకు అందిన వివరాల ప్రకారం
- హైదరాబాద్ - 46.08 శాతం
- సికింద్రాబాద్‌ - 48.11 శాతం
- మల్కాజిగిరి - 50.12 శాతం
- ఆదిలాబాద్‌ - 72.96 శాతం
- చేవెళ్ల - 59.94 శాతం
- కరీంనగర్‌ - 72.33 శాతం
- ఖమ్మం - 75.19 శాతం
- మహబూబాబాద్‌ - 70.68 శాతం
- మహబూబ్ నగర్‌ - 71.54 శాతం
- మెదక్‌ - 74.38 శాతం
- నాగర్ కర్నూల్‌ - 68.86 శాతం
- నల్గొండ - 73.78
- నిజామాబాద్ - 71.50
- పెద్దపల్లి - 67.88
- వరంగల్‌ - 68.29
- జహీరాబాద్‌ - 74.54 శాతం
సాయంత్రానికి పోలింగ్ పూర్తి వివరాలు : ఇంకా పోలింగ్ అధికారులు పోలింగ్ లెక్కలను కొలిక్కి తెస్తున్నారు. ఈ సాయంత్రం వరకు కచ్చితమైన పోలింగ్ శాతం తేలుతుందని సీఈవో వికాస్ రాజ్ తెలిపారు. పోలింగ్ పూర్తయ్యాక ఈవీఎంలను రాష్ట్రవ్యాప్తంగా ఏర్పాటు చేసిన 44 స్ట్రాంగ్ రూంలకు తరలించారు. సోమవారం ఒక్క రోజునే 400 ఫిర్యాదులు వచ్చి, 38 కేసులు నమోదైనట్లు రాష్ట్ర ఎన్నికల ప్రధాన అధికారి వికాస్ రాజ్ తెలిపారు. పోలింగ్ సజావుగా, ప్రశాంతంగా జరిగిందని ఆయన స్పష్టం చేశారు. పోలింగ్కు సహకరించిన వారందరికీ ధన్యవాదాలు చెప్పారు. పోలింగ్ను నేడు ఎన్నికల అధికారులు సమీక్షించనున్నారు. ఎక్కడైనా రీపోలింగ్ అవసరమైతే నేడు నిర్ణయం తీసుకోనున్నారు. స్ట్రాంగ్ రూంల వద్ద పటిష్ఠ భద్రత ఏర్పాట్లు చేసినట్లు రాష్ట్ర ఎన్నికల అధికారి తెలిపారు.
లోక్సభ నాలుగో దశ ఎన్నికలు- ఓటింగ్ శాతం ఎంతంటే? - LOK SABHA POLLS 2024
