Telangana Weather Report Today : వచ్చే రెండు రోజుల పాటు రాష్ట్రంలో అక్కడక్కడ ఉరుములు మెరుపులతో కూడిన వర్షపాతం నమోదయ్యే అవకాశం ఉందని వాతావరణ శాఖ తెలిపింది. ఈరోజు రంగారెడ్డి, నాగర్ కర్నూల్, మహబూబ్నగర్, వికారాబాద్, సంగారెడ్డి జిల్లాలలో సాయంత్రం ఈదురు గాలులతో కూడిన వర్షం కురిసే అవకాశం ఉందని సూచించింది. రేపు వర్షపాతం తగ్గి అక్కడక్కడ సాయంత్రం వేళ ఉరుములు మెరుపులతో కూడిన వర్ష పాతం నమోదయ్యే అవకాశం ఉందని, భారీ వర్ష సూచన ఏమీ కనిపించడం లేదని వాతావరణ శాఖ అధికారులు తెలిపారు.
మే 20 తర్వాత గరిష్ట ఉష్ణోగ్రతలు : మే 12వ తేదీన మాత్రం రాష్ట్రంలో విస్తారంగా వర్షాలు కురిసే అవకాశం ఉందని వాతావరణ శాఖ అధికారులు వెల్లడించారు. ఈ నాలుగు రోజుల పాటు వాతావరణం చల్లబడే అవకాశం ఉందని, ఆదిలాబాద్ మంచిర్యాల, నిర్మల్ మినహా రాష్ట్రం మొత్తం మీదుగా 36 నుంచి 40 డిగ్రీలు మేర ఉష్ణోగ్రతలు నమోదయ్యే అవకాశం ఉందని తెలిపారు. మే 15 తేదీ వరకు ఇలాంటి పరిస్థితే నెలకొని ఉంటుందని చెప్పారు. మే 20వ తేదీ తర్వాత రాష్ట్రంలో గరిష్ట ఉష్ణోగ్రతలు నమోదవుతాయని వాతావరణ శాఖ తెలిపింది.
Rain Fall in hyderabad : మరోవైపు రాష్ట్రంలో ఈరోజు తేలికపాటి నుంచి మోస్తరు వర్షాలు కురిసే అవకాశం ఉందని హైదరాబాద్ వాతావరణ కేంద్రం వెల్లడించింది. ఇదే సమయంలో ఉరుములు మెరుపులతో గంటకు 40 నుంచి 50 కిలోమీటర్ల వేగంతో ఈదురుగాలులు వీచే అవకాశాలున్నాయని తెలిపింది. రేపు ఎల్లుండి దాదాపుగా ఇదే పరిస్థితి కొనసాగనుందని, ఈదురు గాలులు గంటకు 30 నుంచి 40 కిలోమీటర్ల వేగంతో వీస్తాయని పేర్కొంది.
రాష్ట్రంలో కురిసే వర్షాలకు ప్రజలు అప్రమత్తంగా ఉండాలని వాతావరణ శాఖతో పాటు జీహెచ్‌ఎంసీ అధికారులు సూచించారు. ఈ నెల 7న కురిసిన వర్షానికే నగరంలో పలు చోట్ల నీళ్లు నిలిచిపోగా అక్కడక్కడ చెట్లు విరిగిపడ్డాయి. దీంతో ట్రాఫిక్ స్తంభించిపోయింది. ఉరుములు, మెరుపులతో వర్షాలు కురిసే సమయంలో పిడుగులు ఎక్కువగా ఉంటాయని, ఆ సమయంలో ప్రజలు బయటకు రావొద్దని అధికారులు హెచ్చరిస్తున్నారు.
'గత 24 గంటలు చూసుకున్నట్లయితే ద్రోణి ప్రభావం మరింత బలపడి రాష్ట్రవ్యాప్తంగా విస్తారంగా వర్షాలు కురిశాయి. వచ్చే రెండ్రోజుల్లో కూడా ఉరుములు మెరుపులతో కూడిన వర్షపాతం అక్కడక్కడ నమోదయ్యే అవకాశం ఉంది. భారీ వర్షపాతం సూచనలు అయితే కనిపించడంలేదు'-శ్రావణి, వాతావరణ శాఖ అధికారి
