వరల్డ్ ఫేమస్ హైదరాబాదీ హలీమ్ - విదేశాలకు సైతం ఎగుమతి - Ramadan Special Dishes

Demand for Hyderabad Haleem : హలీమ్ ఈ పేరు వినగానే అందరి నోళ్లలో నీళ్లూరుతాయంటే అతిశయోక్తి కాదు. ఈ వంటకం ప్రత్యేకతే వేరు మరి. కట్టెల పొయ్యి మీద స్వచ్ఛమైన నెయ్యితో చికెన్, మటన్​ను బాగా ఉడకబెట్టి చేసే వంటకం ఇది. రంజాన్‌ మాసంలో ఉపవాసాలు ఉండే ముస్లింలు సాయంత్రం వేళల్లో ప్రార్థనల అనంతరం దీనిని ఆరగిస్తుంటారు. ఒకప్పుడు ముస్లింలు తినే ఈ వంటకం నేడు అందరికీ ప్రీతిపాత్రమైంది. దీనిలో రుచి మాత్రమే కాదు, ప్రోటీన్ కూడా అంతే ఉంటుంది. అందుకే ముస్లింలు రోజంతా ఉపవాసం ఉండటానికి కావాలసిన ప్రోటీన్ దొరుకుతుందని దీనిని ఆరగిస్తుంటారు.

Hyderabadi Haleem : అందుకే హైదరాబాదీ హలీమ్​కు (Hyderabadi Haleem) జీఐ గుర్తింపు వచ్చి, ప్రత్యేక బ్రాండ్‌గా కొనసాగుతోంది. హైదరాబాద్​లో హలీమ్ తయారీలో పేరుగాంచిన పిస్తా హౌజ్‌ రోజుకు 10,000ల కిలోల హలీమ్​ను విక్రయిస్తోందని ఆ సంస్థ నిర్వాహకులు చెబుతున్నారు. దక్షిణ భారతదేశంలో మాంసం అధికంగా లభిస్తుంది. దీని వల్ల హలీమ్‌కు కావాల్సిన ముడి సామాగ్రి అంతా ఇక్కడే లభిస్తుండటంతో ఎక్కువ శాతం ఇక్కడి నుంచే వేరే దేశాలకు హలీమ్​ను ఎగుమతి చేస్తారు. ముఖ్యంగా హైదరాబాద్‌లోని పిస్తా హౌస్‌, రాయదుర్గంలోని ఓల్డ్‌ సిటీ రెస్టారెంట్‌, ప్యారడైజ్‌ రెస్టారెంట్లు ఈ నెలలో వేరే దేశాలకు దీనిని ఎగుమతి చేస్తుంటాయి.

Ramadan Festival 2024 : అయితే కొన్నిసార్లు రవాణా ఆలస్యం కావడంతో దాని రుచి మారడం, పాడవడం వంటి సమస్యలు ఎదురవుతుంటాయి. అలా కాకుండా నేరుగా వంట వాళ్లనే అక్కడికి పంపి అక్కడే ఔట్​లెట్​ ఏర్పాటు చేసి, వాటిని తాజాగా వండి విక్రయిస్తున్నారు. దేశాల్లో హలీమ్ తయారు చేసే షెఫ్​లకు నెలకు రూ.2 లక్షలకు పైగా వేతనం చెల్లిస్తారు. కేవలం షెఫ్​లను పంపితే వారికి వచ్చే ఆదాయంలో పది శాతం కమిషన్​గా ఇస్తారని హోటల్ నిర్వాహకులు అంటున్నారు. అందరికీ ప్రియమైన వంటకమైన హలీమ్ భారతీయులకే కాదు విదేశీయుల మనసులనూ దోచేసుకుంది. దీన్ని రుచి చూడటం కోసం విదేశీయులు సైతం సంవత్సరం మొత్తం వేచిచూడటం విశేషం.

'నాణ్యత​ విషయంలో మేము చాలా ఫోకస్​ చేస్తాం. చుట్టూ మొత్తం క్లీన్​గా​ ఉంచుతాం. హలీమ్​లో మూడు పదార్థాలు ఉంటాయి. 100 శాతం మటన్, చికెన్​, నెయ్యి ఉంటుంది. హలీమ్​ను ఇక్కడి నుంచి ఇతర దేశాలకు కూడా ఎగుమతి చేస్తాం.'- మహమ్మద్ అఖీల్, పిస్తా హౌజ్ ఫుడ్ ప్రొడక్షన్ మేనేజర్